Vikipediya:İnzibatçılığa namizədlik üçün təlimatlar

Bu səhifə inzibatçı olmağı düşünən istifadəçilərə kömək etmək və yol göstərmək məqsədi daşıyır. Bir istifadəçinin inzibatçı olması üçün səsvermə yolu ilə vikicəmiyyətin təsdiqini qazanmalıdır.

İnzibatçılığa ilk dəfə namizəd olan şəxs üçün namizədlik prosesi qarışıq və çətin gələ bilər. Hətta bu hala görə istifadəçi namizədlikdə uğursuz ola və Vikipediyada fəaliyyət göstərməklə bağlı həvəsi azala bilər.

Namizədlikdən əvvəl

İnzibatçılığa namizəd olmazdan qabaq özünüzə bu sualları verməyə çalışın:

• Vikipediyanın qaydaları və prinsipləri ilə yaxından tanışammı?
• İnzibatçı seçildikdən sonra səhifələrin silinməsi və mühafizəsi, qaydaları pozan istifadəçilərin bloklanması, tarixçələrin silinməsi və gizlədilməsində aktiv iştirak edəcəyəmmi? Silmə, mühafizə, bloklama, tarixçə düzəlişi alətlərindən tez-tez istifadə edəcəyəmmi?
• İnzibatçı seçildikdən qısa müddət sonra fəallığımı xeyli azaldacaq və dayandıracaq hadisə baş verəcəkmi və ya planım olacaqmı?
• Mübahisələrin həll edilməsində iştirak edəcəyəmmi? Müzakirələr zamanı tərəfsiz, səbrli, dözümlü, qərəzsiz, eləcə də, qaydalara uyğun şəkildə davrana biləcəyəmmi?
• İnzibatçı seçilməyim həqiqətən Vikipediyaya bir şey qatacaqmı?

Unutmayın ki, inzibatçı statusu olmadan da Vikipediyada bir çox şey edə bilərsiz:

• yüksək keyfiyyətli məqalələr yaratmaq.
• təkmilləşdirmə işlərində məşğul olmaq.
• vandalizmlə mübarizə aparmaq üçün patrul və rolbaker olmaq.
• sistem məlumatlarını tərcümə etmək.
• yeni istifadəçilərə kömək etmək.

Namizədlikdən öncə bir daha xatırlayın ki, inzibatçılıq nə mükafat, nə diplomatik toxunulmazlıq statusu, nə də bir imtiyazdır.

Axtarılan xüsusiyyətlər

Vikicəmiyyət inzibatçı namizədində axtardığı keyfiyyətlər müxtəlifdir. Ona görə də bu barədə konkret fikir bildirmək çətindir. Ən yaxşı yol arxivdəki namizədliklərlə tanış olub keçmiş müzakirələri oxumaqdır. Bu sayədə istifadəçilərin inzibatçılarda axtardığı keyfiyyətlər haqqında ümumi fikir sahibi ola bilərsiz. İstifadəçilərin inzibatçılarda axtardığı xüsusiyyətləri bu cür ümumiləşdirmək olar:

• Redaktə sayı. Adətən 10-20 mindən çox redaktəsi olan istifadəçinin inzibatçı seçilmə ehtimalı daha yüksək olur.
• Uzun müddətli fəaliyyət. 1 ilə yaxın fəaliyyət göstərən istifadəçilərin inzibatçı seçilmə ehtimalı az olur. Bu cür namizədlərdən daha çox təcrübə toplaması gözlənilir. Namizədlik üçün 2 il və ya daha uzunmüddətli fəaliyyət daha çox tövsiyə olunur.
• Keyfiyyətli məqalələr. Keyfiyyətli məqalələr yaratmaq istifadəçinin stil kitabçasına, eləcə də, qaydalara nə dərəcədə bələd olduğunun bir göstəricisidir və istifadəçilərdə xoş təəssürat buraxır.
• Dil biliyi. Azərbaycan dilini çox pis bilən istifadəçinin inzibatçı seçilmə ehtimalı çox az olur.
• Qaydaları bilmək. Vacib qaydaları bilməyən istifadəçinin inzibatçı seçilməsi çox mümkün olmur. Namizəddən inzibatçılıq, silmə, bloklama, nəzakət, ensiklopedik əhəmiyyətlilik, müəlliflik hüququ, adlandırma, konfliktlər, səsvermə bağlı qaydalar haqqında məlumatlı olması gözlənilir.
• Bloklanmama. Tez-tez, mütəmadi olaraq blokda olmaq namizədlik üçün mənfi haldır. Hətta bəzi istifadəçilər tez-tez bloklanmanı əsas gətirərək namizədə əlehinə səs verə bilərlər.
• Tərəfsizlik və qərəzsizlik. Tərəf tutmaq, müəyyən istifadəçiyə qarşı qərəzli, aqressiv davranmaq vikicəmiyyətdə xoş qarşılanmır və seçilməmək üçün böyük səbəb ola bilər.
• Müzakirələrdə aktivlik. Müzakirələrdə iştirak etməyən və ya passiv iştirak edən istifadəçilərin vikicəmiyyət tərəfindən inzibatçı seçilmə ehtimalı çox aşağıdır.
• Nəzakətlilik və səbrlilik. Müzakirələrdə kobud dildə danışmaq, etika qaydalarına riayət etməmək, nəzakətsiz danışıq üslubu, hövsələsiz davranmaq istifadəçilər tərəfindən mənfi xüsusiyyətlər kimi qəbul olunur.
• Komanda ilə iş. Digər istifadəçilərin fikrini nəzərə almaq, redaktə müharibəsində iştirak etməmək, ümumi qəbul edilmiş qərarlara riayət etmək, vacib qərarlar üçün vikicəmiyyətin də fikrini soruşmaq namizəddə axtarılan xüsusiyyələrlərdir.
• Müstəqillik. Başqa bir istifadəçinin təsirində olmaq, səsvermələrdə qruplaşmaq inzibatçı seçilmək şansını azaldır.
• Etibarlılıq. Saxtakarlıqla məşğul olan, kukla hesablar işlədən, səs ovçuluğundan istifadə edən, vikicəmiyyəti aldadan istifadəçilərin inzibatçı seçilmə ehtimal demək olar ki, olmur.

İnzibatçıların rəyini soruşmaq

İnzibatçılığa namizədlik verməzdən öncə atılacaq müsbət addımlardan biri digər inzibatçıların fikrini soruşmaqdır. Xüsusilə, namizədliklə bağlı tərəddüdləriniz varsa, inzibatçıların rəyini almaq tövsiyə olunur. Digər inzibatçıların fikrini soruşaraq inzibatçı seçilib-seçilməmə ehtimalınız haqqında müəyyən fikir sahibi ola bilərsiz. Bunun üçün 3-4 aktiv inzibatçıya müraciət yollamaq kifayətdir. Onlara inzibatçılığa namizəd olmağı düşündüyünüzü bildirin, bu barədə nə düşündüklərini soruşun, inzibatçılıq üçün hansı keyfiyyətlərinizin çatışmadığını öyrənməyə çalışın. Sonda təşəkkür etməyi unutmayın!

Namizədlik və səsvermə

İnzibatçılığa hazır olduğunuza əmin olduqdan sonra İnzibatçılar səhifəsində öz namizədlik səsvermənizi başlada bilərsiniz. Səsverməni başlatmaq üçün buradakı əlavəni doldurub "İnzibatçı statusunun verilməsi ilə bağlı səsvermələr" başlığının altına yerləşdirməlisiniz. Beləliklə, inzibatçılıq namizədliyiniz və inzibatçılıq səsverməniz başlamış olur.

Səsverməni başlatdıqdan dərhal sonra indiyə kimi verdiyiniz töhfələr, inzibatçılığa namizədlik səbəbiniz, inzibatçı seçildikdən sonrakı fəaliyyət haqqında məlumat yerləşdirib istifadəçiləri məlumatlandırın. Bu, sizin seçilmə ehtimalınızı artıra bilər. Sizə sual verən istifadəçiləri cavabsız qoymayın, suallara səbrlə yanaşın. Səsvermənin gedişatı zamanı istifadəçilərin müxtəlif fikirləri ilə qarşılaşa bilərsiz, çünki yuxarıda da qeyd olunduğu kimi vikicəmiyyətin inzibatçılarda axtardığı keyfiyyətlər müxtəlifdir. Odur ki, əlehinə səs versə bilə, hər bir istifadəçinin fikrinə hörmətlə yanaşın, heç bir halda üstünə getməyin.

Səsvermə haqqında digər istifadəçiləri məlumatlandırmaq istəyirsizsə, Kənd meydanında bu barədə məlumat xarakterli yazı yerləşdirin. Digər istifadəçilərə dəvətnamələr də göndərə bilərsiz, amma bunu kütləvi şəkildə aparmamalısız. Sadəcə aktiv istifadəçilərdən 10-15 nəfər dəvətnamə göndərməyiniz daha məqbuldur. Kütləvi şəkildə dəvətnamələr göndərmək vikicəmiyyətdə xoş təəssürat buraxmır. Vikipediyadan qıraq vasitəsilər, məsələn, sosial şəbəkələr vasitəsilə səsvermənizə istifadəçilər dəvət göndərib onları səs verməyə məcbur etməyin. Bu, səs ovçuluğu hesab olunur və sizin namizədliyinizə mənfi təsir edə, hətta səsvermənizin dayandırılmasına gətirib çıxara bilər.

Səsvermənin gedişatına təsir edən faktorlar

Bəzi faktorlar sizin səsvermənizin gedişatına təsir edə, hətta istifadəçilərin səslərinin dəyişməsinə səbəb ola bilər. Onları bu cür ümumiləşdirmək olar:

• Mütəmadi namizədlik. Qısa müddət ərzində bir neçə dəfə namizəd olmaq vikicəmiyyətdə xoş təəssürat buraxmır və bəzi istifadəçilər bunu "güc mübarizəsi" kimi qəbul edə bilərlər.
• Qarşı səslərə münasibət. Qarşı səs verən istifadəçilərin üzərinə getmək, onlara qarşı aqressiv davranmaq, bu barədə təzyiq etmək səsverməyə mənfi göstərir. Bunu görən digər istifadəçilər qarşı səs verə bilərlər.
• Kukla hesablar. Kukla hesablarla özünüzə səs vermək yol verilməzdir. Buna görə hətta səsvermə zamanı bloklana bilərsiniz.
• Səs ovçuluğu. Heç bir halda başqalarını səsverməyə qatılmağa məcbur etməyin, lehinə səslər istəməyin, gizli şəkildə səs ovçuluğu ilə məşğul olmayın.