Vladimir Volobuyev
Volobuyev Vladimir Rodionoviç (25 iyul 1909, Krasnodar - 5 noyabr 1987, Bakı) ― torpaqşünas alim, AMEA-nın həqiqi üzvü (1958), SSRİ Elmlər Akademiyasının müxbir üzvü (1968), iki dəfə SSRİ Dövlət mükafatı laureatı, Əməkdar elm xadimi, kənd təsərrüfatı elmləri doktoru (1946), professor (1949).[1][2][3]
| Vladimir Volobuyev | |
|---|---|
| Volobuyev Vladimir Rodionoviç | |
| Doğum tarixi | |
| Doğum yeri | Krasnodar |
| Vəfat tarixi | (78 yaşında) |
| Vəfat yeri | Bakı |
| Elmi dərəcəsi | kənd təsərrüfatı elmləri doktoru (1946) |
| Elmi adı | professor |
| Təhsili | Kuban şəhəri Kənd Təsərrüfatı İnstitutu |
| Tanınır | torpaqşünas alim |
Həyatı redaktə
Vladimir Volobuyev 25 iyul 1909-cu ildə Krasnodar şəhərində anadan olmuşdur. Ali təhsilini 1930-cu ildə Kuban şəhərindəki Kənd Təsərrüfatı İnstitutunda almışdır.[2][3]
Əmək fəaliyyəti redaktə
Vladimir Volobuyev 1931-1937-ci illərdə Tiflis şəhərində Zaqafqaziyanın Su Təsərrüfatı İnstitutunda (indiki Azərbaycan Dövlət Su Təsərrüfatı Layihə İnstitutu) böyük torpaqşünas vəzifəsində çalışmışdır. 1937-1939-cu illərdə yenə həmin institutda Torpaq-meliorasiya sektorunun direktoru kimi fəaliyyət göstərmişdir. Bakıya qayıdan Vladimir Volobuyev 1939-1941-ci illərdə Az.FAN-nın Torpaqşünaslıq şöbəsində Torpaq fizikası bölməsinə rəhbərlik etmişdir. Bununla yanaşı, o, Cənubi Muğan, Böyük Qaraçalı, Pir Araks, Şirvan və Kür-Araz ovalığı torpaq ekspedisiyasına da rəhbərlik etmişdir.[2][3]
Vladimir Volobuyev 1945-1946-cı illərdə Qafqaz Su Təsərrüfatı ET İnstitutunun Azərbaycan filialının direktor müavini vəzifəsini icra etmişdir. 1947-1948-ci illərdə Azərbaycan SSR EA Torpaqşünaslıq və Aqrokimya İnstitutunda böyük elmi işçi vəzifəsində çalışmışdır. Yenə həmin institutda 1949-1950-ci illərdə Torpaqların meliorasiyası laboratoriyasına rəhbərlik etmişdir. Vladimir Volobuyev 1950-1952-ci illərdə institutun direktor müavini, 1952-1956-cı illərdə direktoru olmuşdur. Habelə Biologiya və kənd təsərrüfatı elmləri şöbəsinin akademik-katibi vəzifəsində çalışmışdır. Vladimir Volobuyev 1957-1958-ci illərdə Az.SSR EA-nın vitse-prezidenti olmuşdur.[2]
Elmi fəaliyyəti redaktə
Vladimir Volobuyev Azərbaycanın iri irriqasiya-meliorasiya obyektlərinin tədqiqi nəticəsində meliorativ rayonlaşma prinsiplərini müəyyən etmiş və onların yuyulması nəzəriyyəsini yaratmışdır. Həmçinin duzların miqrasiya proseslərinin 6 genetik formasını müəyyən etmişdir. Bunula bərabər, torpaq ekologiyası, təsnifatı və diaqnostikası məsələlərini işləyib hazırlamışdır. O, respublikada torpaqəmələgəlmənin energetikasına dair təlimin elmi əsaslarını inkişaf etdirmişdir.
Vladimir Volobuyev 1944-cü ildə fəlsəfə doktoru, 1946-cı ildə kənd təsərrüfatı elmləri doktoru elmi dərəcəsini almışdır. O, 1949-cu ildə professor adına layiq görülmüşdür. 1955-ci ildə Azərbaycan Elmlər Akademiyasının müxbir üzvü, 1958-ci ildə həqiqi üzvü seçilmişdir. 1968-ci ildə isə SSRİ EA–nın müxbir üzvü seçilən Vladimir Volobuyevin rəhbərliyi ilə 15 elmlər və 2 fəlsəfə doktoru hazırlanmışdır. Professor 5 kitab, 156 məqalə, 4 xəritənin və 5 patentin müəllifidir.
Üzv olduğu şuralar redaktə
- Keçmiş Ümumittifaq Torpaqşünaslar Cəmiyyətinin Mərkəzi Şurasının üzvü;
- SSRİ Meliorasiya və Su Təsərrüfatı Nazirliyinin Elmi-Texniki Şurasının üzvü;[2]
Mükafatları redaktə
Vladimir Volobuyev SSRİ Dövlət Mükafatı laureatı, Əməkdar elm xadimi fəxri adlarına, habelə Mendeleyev adına mükafata layiq görülmüş, iki dəfə Qırmızı Əmək Bayrağı, həmçinin Xalqlar Dostluğu, Şərəf Nişanı ordenləri ilə, V.V.Dokuçayev adına Qızıl medalla təltif olunmuşdur.[2][3]
İstinadlar redaktə
- ↑ "Akademik Vladimir Volobuyevin 110 illiyinin qeyd edilməsi haqqında" (Azərbaycan). e-qanun.az. 14-11-2022 tarixində arxivləşdirilib.
- ↑ 1 2 3 4 5 6 "Volobuyev Vladimir Rodionoviç" (Azərbaycan). science.gov.az. 18-09-2021 tarixində arxivləşdirilib.
- ↑ 1 2 3 4 "Görkəmli torpaqşünas alim Vladimir Volobuyevin 110 illik yubileyinə həsr olunan yığıncaq keçirilib" (Azərbaycan). gencalimler.az. 11-16-2022 tarixində arxivləşdirilib.