Yunus Oğuz

Yunus Oğuz (22 iyul 1960, Əli-Bayramlı) — Milli Vəhdət Partiyasının keçmiş sədri (2000–2023), Vəhdət Partiyası sədrinin sabiq birinci müavini (1998–2000), Xalq Azadlıq Partiyasının sədri (1997–1998; 1990), Azərbaycan Xalq Cəbhəsi sədrinin müavini, İdarə Heyətinin üzvü, (1992) jurnalist.

Yunus Oğuz
Milli Vəhdət Partiyasının sədri
2000 – 13 mart 2023
Əvvəlki	vəzifə təsis edildi
Sonrakı	vəzifə ləğv edildi
Vəhdət Partiyası sədrinin birinci müavini
1998 – 2000
Sədr	Tahir Kərimli
Əvvəlki	Sahib Məmmədov
Sonrakı	Əbdülvahab Manafov
Xalq Azadlıq Partiyasının sədri
1997 – 1998
Əvvəlki	Qənimət Zahid
yanvar 1990 – ?
Sonrakı	Qənimət Zahid
Azərbaycan Xalq Cəbhəsinin sədr müavini
1992 – 1994
Sədr	Əbülfəz Elçibəy
Şəxsi məlumatlar
Doğum tarixi	22 iyul 1960(1960-07-22) (64 yaş)
Doğum yeri	Əli-Bayramlı, Azərbaycan SSR, SSRİ
Partiya	Vəhdət Partiyası (1998–2000), Xalq Azadlıq Partiyası[d] (1997–1998), Azərbaycan Xalq Cəbhəsi (1990–1994), Xalq Azadlıq Partiyası[d] (1990–bilinmir)
Fəaliyyəti	yazıçı
Təltifləri

Həyatı

Yunus Oğuz 1960-cı il iyulun 22-də Şirvan şəhərində anadan olub. 1977-ci ildə orta məktəbi bitirdikdən sonra bir il Şirvan DRES-də fəhlə işləyib. 1978–1979-cu illərdə Bakı şəhəri 6 nömrəli texniki peşə məktəbində təhsil alib. 1979–1981-ci illərdə sovet ordusunda xidmət edb. Ordudan tərxis olunduqdan sonra 1983-cü ilin avqust ayına qədər Şirvan şəhər pambıqtəmizləmə zavodunda mülku müdafiə qərargahının rəisi vəzifəsində çalısıb.

Həmin müddətdə ictimai əsaslarla zavodun komsomol təşkilat katibi secilib. 1983-cü ildə Rostov Dövlət Universitetinə daxil olub və 1988-ci ildə RDU-nun fəlsəfə fakültəsini bitirərək filosof ixtisasina yiyələnib. Ali təhsilini bitirdikdən sonra təyinatla Azərbaycan SSR Elmlər Akademiyasının Fəlsəfə və hüquq İnstitutuna göndərilib və burada kiçik elmi işçi vəzifəsində çalışıb.

İctimai-siyasi fəaliyyəti

1988-ci ildən də Milli Azadlıq Hərəkatına aktiv qoşulub. 1990-cı ilin yanvarında akademiyanın bir qrup gənc alimi ilə Xalq Azadliq Partiyasının (XAP) yaradıb və onun sədri seçilib.

1990-cı ildə Azərbaycan Xalq Cəbhəsi Ali Məclisinə, sonra Azərbaycan Xalq Cəbhəsi İdarə Heyətinə üzv seçilib. 1992-ci ildə AXC idarə heyəti ləğv olunduqdan sonra AXC sədrinin müavini təyin olunub.

1993-cü ildə Azərbaycan Respublikası Prezidentinin müşaviri təyin edilib.

1994-cü ildə Azərbaycan Xalq Cəbhəsini tərk edərək Azərbaycan Bütövlüyü Uğrunda Cəmiyyəti və eyniadlı partiyanı təsis edərək partiyanın sədri seçilib. Yunus Oğuzun təşəbbüsü ilə 1997-ci ildə ABUP və XAP birləşib və birləşmiş Xalq Azadlıq Partiyasınin sədri seçilib.

1998-ci ildə XAP daxilində bölünmə yaşanmış, Yunus Oğuz və tərəfdarları partiyanın Vəhdət Partiyasına birləşdiyini elan etmişdir. Yunus Oğuz birləşmiş Vəhdət Partiyasının sədrinin birinci müavini seçilmişdir. 2000-ci ildə Vəhdət Partiyası daxilində bölünmə yaşanmış və Yunus Oğuz başçılığında qrup partiyanın adını Milli Vəhdət Partiyası olaraq dəyişdirildiyini elan edərək yeni partiyanın təsis edildiyini açıqlamışdır. Partiya qurultayında Yunus Oğuz Milli Vəhdət Partiyasının sədri seçilmişdir. 2023-cü ildə Milli Vəhdət Partiyası fəaliyyətini dayandırmışdır.

Seçkilər

15 oktyabr 2003-cü ildə keçirilən prezident seçkilərində namizədliyi qeydə alınıb və Azərbaycan Respublikasının hazırkı prezidenti İlham Əliyevin xeyrinə namizədliyini geri götürüb.

İctimai fəaliyyəti

Fəlsəfə və hüquq institutunda kiçik elmi işçi işləməklə yanaşı 1989-cu ildən 1991-ci ilədək "Azad söz" qəzetinin, həmçinin Xüsusi bulletenlərin qeyri-leqal nəşrinə rəhbərlik edib. 1991–1992-ci illərdə "Ordu"qəzetinin baş redaktoru vəzifəsində çalışıb.

1995-ci ildən bu günə qədər "Olaylar" İnformasiya Agentliyinin baş direktoru və eyniadlı qəzetin baş redaktoru vəzifəsində çalışır.

Əsərləri

2009-cu ildə Nadir şah romanı Azərbaycan Mədəniyyət Nazirliyi tərəfindən "Qızıl kəlmə" mükafatının "Şans" ödülünə layiq görülüb. 2010-cu ildə "Nadir şah", "Təhmasib şah", "Attila" və "Qədim türklər və passionarlıq nəzəriyyəsi" Türkiyə türkcəsinə çevrilib və bu ölkədə böyük tirajla nəşr olunub. "Nadir şah" romanı 2010-cu ildə ingilis dilində Londonda işıq üzü görüb. "Türkün tarixinə yeni bir baxış" kitabı 2008-ci ildə Təhsil Nazirliyinin qərarı ilə ali məktəblərdə dərs vəsaiti kimi çap olunub. 2011-ci ildə yenə Təhsil Nazirliyinin qərarı ilə "Nadir şah" və "Təhmasib şah" tarixi romanları sinifdənxaric oxu ədəbiyyatı kimi sifariş edilib və çapdan çıxıb.

"Nadir şah" dörd dəfə, "Təhmasib şah" isə üç dəfə yenidən nəşr olunub. "Nadir şah" 2015-ci ildə Akademik Milli Dram Teatrında tamaşaya qoyulub.

2011-ci ildə Milli Elmlər Akademiyası Tarix İnstitutunun Elmi Şurasının qərarı ilə "Qədim türklər və passionarlıq nəzəriyyəsi L. N. Qumilyovun tədqiqatlarında" adlı elmi kitabı işıq üzü görüb və TN-i tərəfindən dərs vəsaiti kimi çap olunub. Bu kitab eyni zamanda 2012-ci ildə İstanbulda nəşr olunub.

2011–2012-ci illərdə iki cildlik "Əmir Teymur – zirvəyə doğru" və "Əmir Teymur — dünyanın hakimi" tarixi romanı dərc olunub. Azərbaycan Elm və Təhsil Nazirliyi tərəfindən dərsdənkənar oxu ədəbiyyatı kimi təkrar nəşr olunub.

Əsərləri Nyu-Yorkda, Londonda, Moskvada, İstanbulda, Kiyevdə, Daşkənddə, Almaatada, Bişkekdə və başqa şəhərlərdə nəşr edilib. Bütövlükdə 22 ölkədə 47 kitabı dərc olunub. Kitabları haqqında üç monoqrafiya yazılıb.

Kitabları

• Qarabağ nəzarətsiz zona (2003) (ingiliscə)
• Siyasi hakimiyyətin idarəetmə prinsipləri (1994)
• Qadın ulduzu (1996)
• Qədim Anadolu və Azərbaycan türkləri (2002) (azərb, türk)
• Türkün tarixinə yeni bir baxış (2006) (azərb, rus, türk)
• Atilla pyesi (2007) (azərb və türk)
• Nadir Şah (tarixi roman) (2008) (azərb, türk və ingilis)
• Təhmasib Şah (tarixi roman) (2009) (azərb və türk)
• Türkün gizli tarixi (2010) (azərb və türk)
• Əmir Teymur zirvəyə doğru (2011) (azərb, türk, özbək, qırğız, qazax, rus)
• Qədim Türklər və passionarlıq nəzəriyyəsi Qumilyovun tədqiqatlarında (2011)
• Əmir Teymur dünyanın hakimi (2012) (azərb, türk, özbək, qırğız, qazax, rus)
• "Şah arvadı və Cadugər" tarixi romanı (2013) (azərb, türk, polyak)
• Sultan Alp Arslan (tarixi roman) (2015) (azərb, türk, özbək)
• Azərbaycanın geosiyasəti Əli Həsənovun tədqiqatlarında (2016)
• Atabəy Eldəniz (tarixi roman) (2017) (azərb, özbək, rus)
• Ovçu (2018)
• Nadir Şah pyesi
• Səfəvi şeyxi tarixi romanı (azərb, özbək və türk) (tarixi roman)
• Altun dəftər pyesi
• Çingiz xan tarixi romanı (azərb və rus)
• Uçurum romanı
• Cığır romanı (azərb, özbək və türk)
• Keçmişdən gələcəyə nə daşıyırıq-Tarix ibrətdir(fəlsəfi-tarixi-publisist düşüncələr)
• Deyirəm oyan, gözünü aç, ayağa dur! İstəmir (felyetonlar) Mən Şuşada yazıram(esselər) kitabı

Mükafatları

2005-ci ildə prezident İlham Əliyev tərəfindən Tərəqqi medalına, 2010-cu ildə "Əməkdar mədəniyyət işçisi"adına layiq görülüb. TÜRKSOY Çingiz Aytmatov adına medalla təltif olunub. Prezident təqaüdçüsü və Özbəkistan Turan Elmlər Akademiyasının akademikidir. 2023-cü ildə Türk Dünyası Araşdırmaları Beynəlxalq Elmlər Akademiyasının fəxri doktoru adına layiq görülüb.