Zinaxanım Salamzadə

Salamzadə Zinaxanım Qafur qızı — Azərbaycanlı memar, tikinti sahəsində ilk fəxri Azərbaycan SSR Əməkdar İnşaatçısı adını alan azərbaycanlı qadın.

Zinaxanım Salamzadə
Zinaxanım Qafur qızı Salamzadə
Doğum tarixi	21 may 1934
Doğum yeri	Bakı, Azərbaycan SSR, SSRİ
Vətəndaşlığı	SSRİ→ Azərbaycan SSR→ Azərbaycan
Milliyyəti	azərbaycanlı
İxtisası	inşaatçı
Təhsili	Azərbaycan Politexnik İnstitutu
Fəaliyyəti	inşaatçı-mühəndis
Fəaliyyət illəri	1957-2007
Mükafatları

Həyatı

Zinaxanım Salamzadə 21 may 1934-cü ildə Bakının Ramana kəndində anadan olub. Atası Qafur kişi neft mədənində işləyirdi. Anası isə evdar qadın idi. O, orta məktəbi 1952-ci ildə bitirib sənədlərini Azərbaycan Politexnik İnstitutuna verərək inşaat fakültəsinə daxil olub. 1957-ci ildə ali məktəbi bitirib, təyinatla Bakı Baş Tikinti İdarəsində əmək fəaliyyətinə başlayıb və 1957–1997-ci illərdə burada çalışaraq böyük uğurlara imza atıb. İşlədiyi illər ərzində adi tikinti ustasından rəhbər vəzifəyədək əmək yolu keçib. Əvvəlcə BBTİ-nin 8 nömrəli tikinti idarəsındə iş ustası vəzifəsinə təyin edilib və 1957–1963-cü illərdə BBTİ-nin 8 nömrəli Tikinti İdarəsində tikinti ustası, iş icraçısı, mühəndis, böyük mühəndis, 1963–1972-ci illərdə Bakı Şəhər Tikinti Trestində mühəndis, böyük mühəndis və istehsalat şöbəsinin rəis müavini vəzifələrində çalışıb. 1972-ci ildə Bakı Baş Tikinti İdarəsinin 11 nömrəli Sosial-Mədəni Tikinti Trestində partiya komitə katibı seçilib. Bu vəzifədə 16 ildən çox — 1988-ci ilə kmi işləyib. 1988–1997-ci illərdə Bakı Baş Tikinti İdarəsinin obyektləri üzrə Dövlət Qəbulu Komissiyasının nümayəndəsi, daha sonra isə 2007-ci ilə kimi həmin trestdə baş məsləhətçi çalışıb.

Zinaxanım Salamzadə inşaatda işlədiyi 50 il ərzində Bakı Baş Tikinti İdarəsinin birinci rəhbəri Mehbalı Əmiraslanovdan başlayaraq axırıncı rəhbər Rauf Gülməmmədova qədər böyük şəxsiyyətlərlə: Sadıx Rəhimovla, Sabir Rzayevlə, Emil Axundovla, Əzim Məsimovla, Əli Təhməzovla, Kamil Quliyevlə işləmişdir. Bundan əlavə, trest rəhbərləri Əli Əliyev, Kamil Heydərov, Marat Allahverdiyev, Binəli Göyüşov, Ataş Təhməzov, Kamil Quliyev, Ədalət Babayev kimi tikintinin sirlərini bilən şəxsiyyətlərlə uzun illər çiyin-çiyinə çalışmışdır.

O, Azərbaycan Qadınlarının I, II, III qurultaylarının nümayəndəsi olub.

Tikintisində zəhməti keçən obyektlər

İş icraçısı işlədiyi zaman Kalinin adına Cihazqayırma Zavodunun işçiləri üçün yaşayış evinin, 1034-cü məhəllədə məktəbin, Musabəyov yaşayış massivində 54, 54A, 57, 57A nömrəli yaşayış evlərinin, 1008-ci məhəllədə uşaq bağçasının və ümumi yataqxananın, uşaq infeksion xəstəxanasının, "Dostluq" kinoteatrının, BBTİ-nin 11 nömrəli İctimai-Mədəni Tikinti trestinin Partiya Komitəsinin katibi çalışdığı zaman "Heydər Əliyev" sarayının, "Gülüstan" sarayının, Cəmşid Naxçıvanski adına Hərbi məktəbin, "Moskva" univermağının, Yazıçıların yaradıcılıq evinin, Artistlər evinin, Xoreoqrafiya Məktəbinin, Beynəlxalq "Gənclik" düşərgəsinin, Manejin, "Qarabağ" mehmanxanasının, Nərimanov, Nizami və Xətai rayon partiya komitələrinin inzibati binalarının, Mərdəkandakı 3 nömrəli xəstəxananın, ATS-in, "Bakı" kinoteatrının və digər sosial obyektlərin, "Fortuna" firmasının xətti ilə isə Əlövsət Quliyev küçəsində 12 mərtəbəli yaşayış binasının tikintisində iştirak etmişdir.

Ailəsi

İki övladı, üç nəvəsi var. Oğlu Azər anasının yolu ilə getmiş, ali təhsilli inşaatçı-mühəndis olmuşdur. Digər oğlu Arzu isə şərqşünas idi.

Şəcərəsi

Zinaxanımın babası Kərbəlayı İsmayıl dövrünün imkanlı, adlı-sanlı, xeyriyyəçi kişilərindən olub, böyük torpaq sahələri olan sahibkar idi. O, öz torpaqlarından çıxarılan neftin hesabına Bakının mərkəzi küçələrində böyük malikanələrə sahib olmuşdu. Mərkəzi Dövlət Tarix Arxivinin verdiyi arayışa əsasən Kərbəlayı İsmayıl İsrafil oğlu Bakıdakı Serkovnı, Çadrovı, Sisianovski, Spasski, Şamaxinski (bunlar paytaxtda olan köhnə küçələrin adlarıdır) küçələrində yerləşən evlərin sahibi olub. Arayışda həmçinin qeyd olunur ki, Kərbəlayı İsmayıl Sabunçudakı 11 və 14 nömrəli torpaq sahələrinin də sahibi olub. Bu gün Ramana kəndində Kərbəlayı İsmayılın adını daşıyan nəvəsi, həmin nəvənin də İsmayıl adlı nəvəsi vardır.

Mükafatları

Azərbaycan SSR-nin Əməkdar İnşaatçısı

Mənbə

• "XX əsr Azərbaycan qadınları" ensiklopediyası
• "Dəyişikliklərə cəsarəti çatan örnək xanımlar: XII–XX əsrlər" kitabı