Ambonlular

Ambonlular – Şərqi İndoneziyada yaşayan xalqdır. Sayları 600 min nəfərdir. Həmçinin Niderlandda da yaşayırlar. Malayya dilinin Melayu-Ambon dialektində və İndoneziya dilləri qrupunun Ambon-Timor dialektində danışırlar. Dindarları müsəlman və xristiandır.

Ambonlular
Vikianbarda əlaqəli mediafayllar

Ambonlular 16–19-cu əsrlərdə avtoxton əhali ilə İndoneziya, Avropa və s. mənşəli köçkünlərin qaynayıb-qarışması nəticəsində formalaşmışlar. 15–16-cı əsrlərdə burada dünyanın ən iri ədviyyat ticarəti mərkəzlərindən biri yaranmışdır. Ambonluların böyük qismi Avropa mədəniyyətini mənimsəmiş, bir hissəsi (bürgerlər) avropalılarla bərabərhüquqlu idi. 1951-ci ildə Cənubi Molukk  Adaları Respublikası adı ilə qurum yaradan Ambonluların separatçı liderləri 1960-cı illərin ortalarınadək müqavimət göstərməkdə davam etmişlər. Ənənəvi məşğuliyyətləri ədviyyat istehsalı, bostançılıq, balıqçılıq və sənətkarlıqdır (dulusçuluq, dəmirçilik, silah hazırlanması, sədəf üzərində oyma və s.). Ambonlular İndoneziyanın ən yüksək təhsil səviyyəsinə malik xalqlarından biridir; İndoneziya ziyalılarının böyük hissəsi Ambonlulardan ibarətdir, çoxları orduda və idarəçilik sahəsində xidmət edir. Ambonlular Cənubi Molukk adalarının digər xalqlarına təsir göstərmiş, bir sıra hallarda onları assimilyasiya etmişlər. Çox zaman Ambonlular adı Maluku vilayətinin bütün əhalisinə şamil olunur.

Mənbə

Azərbaycan Milli Ensiklopediyası (25 cilddə). 1-ci cild: A – Argelander (25 000 nüs.). Bakı: "Azərbaycan Milli Ensiklopediyası" Elmi Mərkəzi. 2009. səh. 414. ISBN 978-9952-441-02-4.