Vikipediya

Azad Fikir Universiteti

Azad Fikir Universiteti — alternativ təhsil layihəsi. 2009-cu ilin oktyabrından fəaliyyət göstərir.

Azad Fikir Universiteti
Yaranma tarixi 2009
azadfikir.org
Vikianbarın loqosu Vikianbarda əlaqəli mediafayllar

Ümumi məlumat

redaktə

Azad Fikir Universiteti 2009-cu ilin oktyabrında öz fəaliyyətində başlamışdır. Layihənin məqsədi gəncliyin rahat toplaşaraq bilik əldə etməsi, müasir, demokratik dəyərlərlə tanış olması, sərbəst müzakirələr apara bilməsi, bir sözlə öz tələbəlik həyatını zənginləşdirməsidir. Azad Fikir Universiteti gənclər və tələbələr üçün alternativ bir təhsil və müzakirə məkanıdır. Layihə çərçivəsində hər çərşənbə axşamı və cümə axşamı iki saat uzunluğunda interaktiv mühazirələr keçirilir.[1]

Azad Fikir Universitetinin uğuru sərbəst mühitdə keçirilən mühazirələrin mövcudluğu və həmin mühazirələrin video[2] və audio yazılarının[3] internet vasitəsilə müxtəlif sosial şəbəkələrdə yayılması ilə əlaqədardır. 2010-cu ildə Azad Fikir Universiteti İnternetdə İfadə Azadlığı üzrə ilk illik diplomatik mükafatına layiq görülüb.[4] 2011-ci ildə layihənin vebsəhifəsi Milli Net — Milli İnternet Mükafatının Elm və Təhsil kateqoriyası üzrə qalibi seçilmişdir.[5] Layihə OL! Azərbaycan Gənclər Hərəkatı tərəfindən həyata keçirilir.

Layihənin ideyası

redaktə

AFU-nun vebsəhifəsində layihənin ideyası haqqında aşağıdakılar yazılıb:

Azərbaycan gəncləri zamanında yenilənən informasiya alma çətinliyi ilə üzləşir. Universitetlərdə zəruri akademik mühitin olmaması yenilikçi müəllim və tələbələrin fəaliyyətinin ya qarşısını alır, ya da onları məhdudlaşdırılır. Bu da ona gətirib çıxarır ki, tələbələr öz ixtisasları barəsində aşağı səviyyəli biliyə sahib olur, insan hüquqları və ifadə azadlığı kimi demokratik dəyərlər haqqında zəif təəssüratlara malik olurlar.

Tələbələrlə ünsiyyət zamanı aydın olur ki, onlara uyğun bilik və tənqidi düşüncə sahibi olan mühazirəçilər gərəkdir. Yerli universitetlərdə bu cür müəllimlərin sayca çox az olması, eləcə də akademik həyatda mühafizəkarların üstünlük təşkil etməsi gənclər üçün maraqlı təhsil imkanlarını daraldır. Bizim məqsədimiz gəncliyin rahat toplaşaraq bilik əldə edə biləcəyi alternativ məkan yaratmaqla onların tələbəlik həyatını zənginləşdirməkdir. Biz Azərbaycanda real alternativ təhsil mərkəzi yaratmağa çalışırıq.[6]

İnteraktiv mühazirələr

redaktə

Azad Fikir Universiteti idniyədək 200-ə qədər interaktiv mühazirə təşkil etmişdir. Ümumilikdə bu dövr ərzində 2500-dən artıq gənc AFU-nun tədbirlərində iştirak etmişdir. Mühazirələr əsasən İnsan Hüquqları, İfadə Azadlığı, İqtisadiyyat, Fəlsəfə, Cəmiyyət, Mədəniyyət, Siyasət istiqamətlərində olur. Mühazirələrdən sonra tədbirin video və audio yazıları internetdə Facebook və Twitter kimi sosial şəbəkələr vasitəsilə yayılır.

Layihədə mühazirəçi kimi müxtəlif yerli və xarici ekspertlər, elm adamları və ictimai-siyasi xadimlər iştirak edirlər. Fəaliyyətə başlayandan indiyədək Azad Fikir Universitetində 50-dən çox spiker iştirak edib. Onların arasında ictimai-siyasi xadimlər Hikmət Hacızadə, Eldar Namazov, İlqar Məmmədov və Erkin Qədirli; filosoflar Rəhman Bədəlov, Ağalar Məmmədov və Niyazi Mehdi; iqtisadçılar Sabit Bağırov, Toğrul Cuvarlı və Qubad İbadoğlu; tarixçilər Altay Göyüşov və Fərda Əsədov, tanınmış jurnalistlər Qulu Məhərrəmli, Zeynal Məmmədli, Xədicə İsmayıl və Çingiz Sultansoy; o cümlədən bəstəkarlar Elmir Mirzəyev, Firudin Allahverdi və professor Rafiq Əliyev olmuşlar.[7]

Hal-hazırda Azad Fikir Universitetinin vebsəhifəsində 100-ə yaxın video mühazirə yerləşdirilmişdir. 2011-ci ilin martın 19-u ABŞ-nin Azərbaycandakı səfiri Metyu Brayzanın iştirakı ilə keçirilən tədbirin videosu Azad Fikir Universitetinin indiyədək ən çox izlənilən videosudur.[8]

Digər fəaliyyətlər

redaktə
Layihə iştirakçıları Azad Fikir Universiteti haqqında
  • İnteraktiv mühazirələrlə yanaşı son iki il ərzində AFU müxtəlif seminarlar, təlimlər, qış düşərgəsi, kitab təqdimatları və digər təqdimatlar həyata keçirmişdir. Layihə çərçivəsində keçirilən seminarlar əsasən İnsan Hüququları və Liderliyin inkişafı mövzularında olmuşdur.
  • 2011-ci ilin yanvar ayında Qəbələ şəhərində 40 gəncin iştirakı ilə AFU Qış Düşərgəsi keçirilmişdir.[9] Düşərgədə spiker qismində filosoflar Rəhman Bədəlov və Ağalar Məmmədov, iqtisadçı ekspert Qubad İbadoğlu, hüquqşünas Erkin Qədirli, jurnalist Xədicə İsmayıl, yeni media eksperti Emin Hüseynzadə və politoloq Rəşad Şirin iştirak etmişlər.
  • Həmin ilin mart ayında 20 gəncin iştirakı ilə 4 günlük Yeni Media kursu keçirmişdir.[10] Bu kurslarda gənclər yeni media alətlərinində effektiv istifadə qaydaları və veb 2.0 alətlərindən istifadə edərək ictimai fəallığın artırılması imkanları haqqında geniş məlumat əldə etmişlər.
  • 2010–2011 mövsümündən etibarən AFU bir neçə kitab təqdimatları həyata keçirməyə başlamışdır. Yeni dərc edilmiş kitabları haqqında təqdimat edən müəlliflər Seymur Baycan, Əli Əkbər, Rasim Qaraca və digərləri olmuşlar. 2011-ci ilin may ayında isə Azad Fikir Universiteti bir qrup könüllü tərəfindən tərcümə edilən Vaslev Havelin məşhur "Gücsüzlərin gücü" kitabını Azərbayan dilində dərc etmişdir.[11]
  • 2011-ci ilin dekabr ayında AFU Açıq Mikrofon Günü keçirmişdir. Tədbirdə gənclər öz istədikləri mövzu ətrafında auditoriya qarşısından çıxış etmişlər.[12]
  • 2011–2012 mövsümündən etibarən AFU Kino Axşamları keçirməyə başlamışdır.[13]

Mükafatlar

redaktə
 
İnternetdə İfadə Azadlığı üzrə mükafatın təqdimatı / Soldan sağa: ABŞ-nin ATƏT-dəki səfiri İan Kelli, Azad Fikir Universiteti layihəsinin rəhbəri Vüqar Salamlı, ABŞ Helsinki komissiyasının məsləhətçisi, səfir Sintia Efrid və ABŞ dövlət katibi köməkçisinin demokratiya və insan hüquqları məsələləri üzrə müavini Tomas O. Melia.
  • 2009-cu ilin dekabrın 18-də Azad Fikir Universitetinin vebsəhifəsi Milli Net mükafatının Elm və Təhsil nominasiyasında ikinci yerə layiq görülüb.[14]
  • 2010-cu ilin noyabrın 27-də Azad Fikir Universiteti ABŞ-ATƏT-in İnternetdə İfadə Azadlığı üzrə ilk illik diplomatik mükafatına layiq görülüb. Bu mükafat ATƏT-in Astana şəhərində keçirilən sammiti zamanı təqdim edilib.
  • 2011-ci ilin dekabrın 23-də Azad Fikir Universitetinin vebsəhifəsi Milli Net mükafatının Elm və Təhsil nominasiyasında qalib seçilmişdir.

İstinadlar

redaktə
  1. ↑ "Azad Fikir Universitetinin mühazirələri". 2012-07-18 tarixində arxivləşdirilib. İstifadə tarixi: 2011-08-02.
  2. ↑ "Azad Fikir Universitetinin video mühazirələri". 2012-05-01 tarixində arxivləşdirilib. İstifadə tarixi: 2011-12-29.
  3. ↑ "Azad Fikir Universitetinin podkastları". 2012-09-02 tarixində arxivləşdirilib. İstifadə tarixi: 2011-12-29.
  4. ↑ "ABŞ-nin ATƏT-dəki missiyasının pres-relizi" (PDF). 2011-11-20 tarixində orijinalından (PDF) arxivləşdirilib. İstifadə tarixi: 2011-08-03.
  5. ↑ "Milli Net 2011-in qalibləri". 2021-10-23 tarixində arxivləşdirilib. İstifadə tarixi: 2011-12-29.
  6. ↑ "Azad Fikir Universitetinin ideyası". 2011-12-05 tarixində arxivləşdirilib. İstifadə tarixi: 2011-08-02.
  7. ↑ azadfikir.org. Thought University Speakers Arxivləşdirilib 2023-06-28 at the Wayback Machine
  8. ↑ "ABŞ səfiri Metyu Brayza AFU-nun qonağı oldu". 2012-06-14 tarixində arxivləşdirilib. İstifadə tarixi: 2011-08-03.
  9. ↑ "AFU qış düşərgəsi keçirdi". 2012-05-01 tarixində arxivləşdirilib. İstifadə tarixi: 2011-08-03.
  10. ↑ "Yeni Media kursuna ərizələrin toplanması başladı". 2012-05-31 tarixində arxivləşdirilib. İstifadə tarixi: 2011-08-03.
  11. ↑ ""Gücsüzlərin gücü" Azərbaycan dilində". 2012-05-01 tarixində arxivləşdirilib. İstifadə tarixi: 2011-08-03.
  12. ↑ "Açıq Mikrofon Günü elanı". 2023-06-28 tarixində arxivləşdirilib. İstifadə tarixi: 2011-12-29.
  13. ↑ "AFU Kino Axşamları". 2012-07-05 tarixində arxivləşdirilib. İstifadə tarixi: 2011-12-29.
  14. ↑ "Milli Net 2009 -un qalibləri". 2021-09-28 tarixində arxivləşdirilib. İstifadə tarixi: 2011-08-03.

Xarici keçidlər

redaktə
Mənbə — "https://az.wikipedia.org/w/index.php?title=Azad_Fikir_Universiteti&oldid=7250306"