Bakı Beynəlxalq Humanitar Forumu
Bakı Beynəlxalq Humanitar Forumu — bəşəriyyətdə maraq doğuran qlobal xarakterli məsələlərə dair geniş spektrli dialoqlar, fikir mübadilələri və müzakirələr aparmaq məqsədi ilə 2011-ci ildən keçirilən tədbirdir. Forum Azərbaycan Respublikasında keçirilir.
| Bakı Beynəlxalq Humanitar Forumu | |
|---|---|
 | |
| Növü | Beynəlxalq |
| Yaranma tarixi | yanvar 2010) |
| Rəsmi dili | azərbaycan, rus, ingilis |
| Mərkəzi |
Bakı,  Azərbaycan |
| Qurucusu | |
| bakuforum.az | |
Ümumi məlumat redaktə
2010-cu ilin yanvarında Azərbaycan Respublikası prezidenti İlham Əliyev və Dmitri Medvedev təşəbbüsü ilə Bakıda keçirilmiş Humanitar Əməkdaşlıq üzrə Birinci Azərbaycan-Rusiya Forumunda qəbul olunmuş qərara əsasən, Birinci Bakı Beynəlxalq Humanitar Forumu təşkil olunmuşdu. Forumun əsas məqsədi — humanitar və inteqrativ impulsların yaradılması ilə yanaşı, gələcəkdə beynəlxalq səviyyədə humanitar çağırışları aktuallaşdırmaqdan ibarətdir, dəyirmi masalar vasitəsilə dialoqun qurulmasıdır. Forumun vəzifəsi ideyalar, nəzəri və praktiki bilik mübadiləsi, konstruktiv debat və müzakirələr üçün nəzəri və tətbiqi platforma yaratmaqdır. Forumun nəticəsi beynəlxalq təşkilatlara, dünya ölkələrinə və ayrılıqda hər bir şəxsə ünvanlanmış tövsiyələr və müraciətlərdə təcəssüm olunur.
Forum təşkilatçılarının və iştirakçılarının, təbii, sosial və humanitar elmlər üzrə Nobel mükafatçılarının və beynəlxalq qurumların rəhbərləri, o cümlədən dünya mədəni elitasının nümayəndələrinin qarşılarında qoyduqları iddialı məsələ, gələcəkdə beynəlxalq səviyyədə baxılması məqsədi ilə yeni humanitar gündəmin formalaşmasıdır. Forum təşkilatçıları sırasına həmçinin dövlətlərin cari və ya keçmiş rəhbərləri və transmilli korporasiyaların təsisçiləri daxildir.
I Bakı Beynəlxalq Humanitar Forumu redaktə
2011-ci ilin 10–11 oktyabr tarixlərində keçirilən "XXI Əsr: ümid və çağırışları" adlı forum çərçivəsində dünyanın 20 dən çox ölkəsindən qonaqlar iştirak ediblər.[1]
Yeddi sahə üzrə dəyirmi masalar təşkil edilmişdir:
- Multikulturalizm: nailiyyətlər və problemlər
- Dünyanı dəyişdirən müasir texnologiyalar
- Elmlərin konvergensiyası
- Biotexnologiyalar və etikanın problemləri
- İnkişafın iqtisadi modelinin humanitar aspektləri
- Sosial jurnalistika və yüksək texnologiyalar
- Postmodernist mədəniyyətdə ənənəvi dəyərlər sistemləri
II Bakı Beynəlxalq Humanitar Forumu redaktə
İkinci Bakı Beynəlxalq Humanitar Forumu 2012-ci il oktyabrın 4–5 keçirildi.[2] Forumda 74 ölkəni və 10 mötəbər beynəlxalq təşkilatı təmsil edən 694 nəfər iştirak etmişdir. Onlardan 2 nəfəri sabiq dövlət başçısı, 13-ü Nobel mükafatı laureatı, 5-i dünyanın nüfuzlu fəxri professoru (Emeritus professor), 63-ü görkəmli ictimai və siyasi xadim idi.
Forumda aşağıdakı istiqamətlər üzrə dəyirmi masalar təşkil olunmuşdur:
- Mültikulturalizm və mədəni özünüdərk
- Cəmiyyətin həyatında mültikulturalizm
- XXI əsrdə qloballaşma proseslərinə yeni metodoloji yanaşmalar
- Konvergensiya edən texnologiyalar və gələcəyin konturları
- Müasir təbabətə və molekulyar biologiyaya baxışları dəyişən texnologiyalar
- İqtisadi inkişafın humanitar aspektləri
- Müasir KİV-lər və yeni çağırışlar
- Postmodernist mədəniyyətdə ənənəvi dəyərlər sistemi[3]
III Bakı Beynəlxalq Humanitar Forumu redaktə
2013-cü il oktyabrın 31-də Heydər Əliyev Mərkəzində Üçüncü Bakı Beynəlxalq Humanitar Forumu işə başlamışdır. Üçüncü Bakı Beynəlxalq Humanitar Forumunda 70 ölkəni və 5 mötəbər beynəlxalq təşkilatı təmsil edən 800 nəfər iştirak etmişdir. Onlardan 7 nəfəri sabiq dövlət başçısı, 13-ü Nobel mükafatı laureatı, 7-i dünyanın nüfuzlu fəxri professoru, 107-i görkəmli ictimai və siyasi xadim idi.[4][5]
Forumda aşağıdakı istiqamətlər üzrə sessiyalar təşkil olunmuşdur:
- Texnologiyaların konvergensiyası və gələcəyin konturları: XXI əsrin əsas çağırışları
- İqtisadi inkişafın humanitar aspektləri
- Elmi innovasiyalar və onların təhsil mühitinə transferi
- Multikulturalizm və özgünlük: cəmiyyətdə dəyər konsensusu axtarışında
- Postmodern dövrdə milli özünüdərk
- Davamlı inkişaf və ekoloji sivilizasiya
- Molekulyar biologiya və biotexnologiyanın nailiyyətləri: nəzəriyyədən təcrübəyə
- Qloballaşan informasiya məkanında medianın aktual məsələləri
IV Bakı Beynəlxalq Humanitar Forumu redaktə
2014-cü ilin 2–3 oktyabr tarixlərində keçirilən Dördüncü Bakı Beynəlxalq Humanitar Forumunda 63 ölkəni və 4 mötəbər beynəlxalq təşkilatı təmsil edən 500 nəfər iştirak etmişdir. Onlardan 4 nəfəri sabiq dövlət başçısı, 14-ü Nobel mükafatı laureatı, 41-i görkəmli ictimai və siyasi xadim idi.[6]
- Multikulturalizmin müqayisəli tədqiqləri: nəzəriyyədən humanist təcrübəyə doğru
- Rəqəmsal dövrdə medianın transformasiyası: inkişafın yeni meylləri
- İnnovativ inkişafda fənlərarası inteqrasiyanın rolu
- Davamlı inkişaf və ekoloji sivilizasiya
- Qloballaşmanın çağırışları: ənənə və transformasiya arasında
- Humanizm postmodern dövrün başlıca dəyəri kimi
- Molekulyar biologiya və biotexnologiya XXI əsrdə: nəzəriyyə, təcrübə, perspektivlər
- Texnologiyaların konvergensiyası və gələcəyin konturları: XXI əsrin əsas çağırışları
V Bakı Beynəlxalq Humanitar Forumu redaktə
2016-cı il sentyabrın 29-da Heydər Əliyev Mərkəzində V Bakı Beynəlxalq Humanitar Forumu işə başlayıb. Forumun işində dünyanın 80-nə yaxın ölkəsindən 400-dən çox nümayəndə (o cümlədən 15 Nobel mükafatı laureatı) iştirak edirdi.
Beşinci Bakı Beynəlxalq Humanitar Forumda aşağıda qeyd olunan mövzular müzakirə olunurdu:
- Multikulturalizmin müxtəlif modelləri: nəzəriyyədən humanist təcrübəyə doğru
- İnsanların kütləvi yerdəyişməsi şəraitində insan kapitalının qorunmasının önəmi davamlı inkişafın əsası kimi
- Jurnalistikanın informasiya dövrünə transformasiyası və onun sivilizasiyalararası dialoqun təmin edilməsində rolu
- Davamlı inkişaf və ekoloji sivilizasiya
- Molekulyar biologiya, biofizika, biotexnologiya və müasir tibb sahəsində kadr hazırlığı məsələləri: innovativ və etik problemlər
- Texnologiyaların konvergensiyası və gələcəyə dair proqnozlar: XXI əsrin əsas çağırışları[7]
VI Bakı Beynəlxalq Humanitar Forumu redaktə
Altıncı Bakı Beynəlxalq Humanitar Forumu 2018-ci il oktyabrın 25–26 keçirildi. Forum "Yeni dünya və yeni insan formalaşdıraq: yaradıcılıq və insan inkişafı" mövzusunda keçirilib. Beynəlxalq tədbirdə 90-dan çox ölkədən və 24 beynəlxalq təşkilatdan 580-dən artıq nümayəndə iştirak edib. Forumda BMT baş katibinin iki müavini, ISESCO, IRCICA, TÜRKPA, TÜRKSOY, Qara Dəniz İqtisadi Əməkdaşlıq Təşkilatı, Beynəlxalq Türk Akademiyası, Parlamentlərarası Birlik, BMT-nin iqtisadi və sosial Şurası kimi təşkilatların rəhbərləri, UNESCO, Beynəlxalq Türk Mədəniyyəti və İrsi Fondu, MDB İcraiyyə Komitəsi rəhbərlərinin müavinləri iştirak ediblər.[8]
Forumda aşağıdakı istiqamətlər üzrə sessiyalar təşkil olunmuşdur:
- Təhsil və elm insan kapitalının inkişafı kontekstində
- İnnovasiyalar yaradıcı iqtisadiyyatın yeni mənbəyi kimi
- Multikulturalizm siyasəti cəmiyyətdə sabitliyin təminatı amili kimi
- Dayanıqlı İnkişaf Məqsədlərinin həyata keçirilməsində regional tərəfdaşlığın gücləndirilməsi
- Yanlış məlumatlandırma siyasəti – müasir dünyada sabitliyə təhdid
- Bakı Prosesi – İnsan təhlükəsizliyi, sülh və davamlı inkişaf naminə mədəniyyətlərarası dialoq: 10 ilin dərsləri və perspektivləri
- Dayanıqlı İnkişaf Məqsədlərinin həyata keçirilməsində regional tərəfdaşlığın gücləndirilməsi[9]
İstinadlar redaktə
- ↑ "Международный гуманитарный форум в Баку пройдет 10–11 октября. (ВЕСТНИК КАВКАЗА)". 2018-03-13 tarixində arxivləşdirilib. İstifadə tarixi: 2018-02-05.
- ↑ "В Баку завершился Второй международный гуманитарный форум(Вести.RU)". 2019-04-25 tarixində arxivləşdirilib. İstifadə tarixi: 2018-02-05.
- ↑ "Bakı Beynəlxalq Humanitar Forumun Rəsmi saytı.(Forum 2012)". 2018-02-26 tarixində orijinalından arxivləşdirilib. İstifadə tarixi: 2018-02-05.
- ↑ "Prezident İlham Əliyev və xanımı III Bakı Beynəlxalq Humanitar Forumunun açılış mərasimində iştirak ediblər". 2021-05-12 tarixində arxivləşdirilib. İstifadə tarixi: 2018-02-05.
- ↑ "İlham Əliyev Üçüncü Bakı Beynəlxalq Humanitar Forumunun açılışında iştirak etmişdir". 2018-02-13 tarixində arxivləşdirilib. İstifadə tarixi: 2018-02-05.
- ↑ "Forum 2014". 2017-10-22 tarixində orijinalından arxivləşdirilib. İstifadə tarixi: 2018-02-05.
- ↑ "Bakı Beynəlxalq Humanitar Forumun Rəsmi saytı.(Forum 2016)". 2018-01-23 tarixində orijinalından arxivləşdirilib. İstifadə tarixi: 2018-02-05.
- ↑ "Bakıda VI Beynəlxalq Humanitar Forumu işə başlayıb". 2019-03-02 tarixində arxivləşdirilib. İstifadə tarixi: 2018-11-01.
- ↑ "VI Bakı Beynəlxalq Humanitar Forumun programı" (PDF). 2020-09-24 tarixində orijinalından (PDF) arxivləşdirilib. İstifadə tarixi: 2018-11-01.