Elçin Əliyev (memar)

Elçin Əliyev
Elçin Əliyev
Azərbaycan Memarlar İttifaqı İdarə Heyətinin sədr müavini
	6 noyabr 2012 – 2017
Sədr	Elbay Qasımzadə
Şəxsi məlumatlar
Doğum tarixi	18 sentyabr 1967 (57 yaş)
Doğum yeri	Bakı, Azərbaycan SSR, SSRİ;
Partiya	Respublikaçı Alternativ Partiyası (2021–);
Təhsili	Azərbaycan Memarlıq və İnşaat Universiteti,; Brtaislava Slovak Texniki Universiteti[d];
Fəaliyyəti	bərpaçı, memar
Elmi fəaliyyəti
Elm sahəsi	Memarlıq
Elmi dərəcəsi	Memarlıq üzrə elmlər doktoru (1998)
Elmi adı	Professor
Təltifləri
	elchinaliyev.az
	Vikianbarda əlaqəli mediafayllar

Elçin Tofiq oğlu Əliyev (18 sentyabr 1967, Bakı) — Azərbaycan memarı, yazıçı, memarlıq üzrə elmlər doktoru (2014), professor, Azərbaycan Memarlar İttifaqının İdarə Heyətinin sədr müavini (2012–2017) və üzvü (1994–2017), Respublikaçı Alternativ Partiyasının Siyası Komitəsinin üzvü və Mədəniyyət Komitəsinin sədri.^[1]^[2]

Həyatı

Elçin Tofiq oğlu Əliyev 1967-ci il sentyabrın 18-də Bakı şəhərində anadan olmuşdur. 1974–1984-cü illərdə 160 nömrəli orta məktəbdə oxumuşdur. 1984-cü ildə Azərbaycan İnşaat Mühəndisləri İnstitutunun Memarlıq fakültəsinə daxil olmuş, 1989-cu ildə fərqlənmə diplomu ilə bitirmişdir. 1987-ci ildə Slovak Ali Texniki Məktəbində istehsalat təcrübəsi keçmişdir.

1998-ci ildə "Bakı şəhərinin mərkəzində şəhər mühitinin sosial-məkan quruluşu" mövzusunda memarlıq üzrə namizədlik dissertasiyasını müdafiə etdi. 2014-cü ildə Elçin Əliyev "Azərbaycanda müasir interyerin dizaynı" mövzusunda doktorluq dissertasiyasını müdafiə etmişdir.

2015-ci ildən Elçin Əliyev Qərb Universitetinin professorudur. O, Qərb Universitetinin Dövlət Attestasiya Komissiyasının sədridir.

Elçin Əliyevin müəllifi olduğu iki nəşr: "Məkanların Astanasında. Bakı tarixini yazan qapılar. 1867–1913 illər" və "Bakı memarlıq abidələrində fasad heykəltəraşlıq nümunələri" Heydər Əliyev Fondu tərəfindən çap olunub. Digər kitab isə, "Konstruktivizm dövrü. XX əsrin 1920–1930-cu illərinin Bakı memarlığı", Azərbaycan Respublikası Prezidentinin sərəncami əsasında Dövlət proqramı çərçivəsində çap olunub.

Memar fəaliyyəti

2004–2005-ci illərdə Bakı şəhərində Katolik Kilsəsinin layihə və inşası ilə bağlı bütün məsələlər üzrə Roma Katolik Kilsəsinin Azərbaycanda səlahiyyətli nümayəndəsi təyin olunmuşdur.

2007-ci ildə Elçin Əliyevin layihəsinə əsasən (memar Paolo Rugeiro ilə birlikdə) Müqəddəs Bakirə Məryəmin Məsum Hamiləliyi kilsəsi inşa edilmişdir.

2011-ci ildə memar Elçin Əliyevin layihəsi əsasında Qəbələ rayonunun Nic kəndində yerləşən "Jotari" kilsəsi yenidən bərpa olunmuşdur.

2014-cü ildə Durbanda keçirilən XXV Dünya Memarlar Konqresində Beynəlxalq Memarlar İttifaqının Gənclərlə İş üzrə Komissiyasının üzvü seçildi.

2016-cı ildə Elçin Əliyevin layihəsi əsasında Zirə kəndində Aydın Qurbanovun xatirəsinə Heydər Əliyev Fondu və Səməd Qurbanov tərəfindən Cümə məscidi inşa edilmişdir.

Elçin Əliyev 2008-ci ildə Turində keçirilən, 2011 ildə Tokioda keçirilən, 2014 ildə Durbandakeçirilən Ümumdünya Memarlıq Konqresslərinin üzvü olmuşdur.

İctimai-siyasi fəaliyyəti

Elçin Əliyev 1988-ci ildə Ümumittifaq Gənc Memarlar Cəmiyyətinin Zaqafqaziya şöbəsinin sədri seçilmişdir.

O, 1989-cu ildən Azərbaycan Memarlar İttifaqının, 1998-ci ildən Azərbaycan Dizaynerlər Birliyinin, 2018-ci ildən isə Azərbaycan Yazıçılar Birliyinin üzvüdür.

1994-cü ildən Azərbaycan Memarlar İttifaqının İdarə Heyətinin üzvü olmuşdur. 2012-ci ildən 2017-ci ilə qədər Azərbaycan Memarlar İttifaqı İdarə Heyəti sədrinin müavini vəzifəsində çalışmışdır.^[3] O, 2015-ci ildə ittifaqın Gəncə bölməsinin məsul katibi seçilmişdir.^[4]

2016-cı ildə Elçin Əliyev Bakı Memarlıq Klubunun prezidenti seçilib. 2017-ci ildə Elçin Əliyev (yazıçı G. A. Rzayeva ilə birlikdə) "Pəncərə – mədəniyyətə baxış" İntellektual Klubunu təsis edir.

Elçin Əliyev hal-hazırda Beynəlxalq Memarlar İttifaqının Gənclərlə İş üzrə Komissiyasının üzvüdür.

Elçin Əliyev 2021-ci ildən Respublikaçı Alternativ Partiyası üzvüdür. O, partiyanın Siyasi Komitəsinin üzvü və Mədəniyyət Komitəsinin sədridir.^[2]

Elçin Əliyev 2024-cü il parlament seçkilərində 23 saylı Nəsimi-Səbail seçki dairəsi üzrə Respublikaçı Alternativ Partiyasının deputatlığa namizədi olmuşdur.^[5]

Təltifləri

2002-ci ildə Rus Pravoslav Kilsəsi tərəfindən Bakıdakı Müqəddəs Mirodaşıyan Zənənlər Baş Kilsəsinin bərpasının layihəsinə, işlərin aparılması və rəhbərliyinə görə "Müqəddəs Sergiy Radonejskiy" ordeni ilə təltif edilmişdir.
2004-cü ildə "Italdesign" şirkəti tərəfindən keçirilən Birinci Bakı Beynəlxalq Memarlıq Müsabiqəsinin qalibi oldu.
2007-ci ildə Azərbaycan Memarlar İttifaqının "Fəxri qızıl nişanı" ilə təltif edilmişdir.
2013-cü ildə Azərbaycan Memarlar İttifaqı tərəfindən "Ustad Memar" adına layiq görülmüşdür.
2013-cü ildə Birinci Bakı Beynəlxalq Memarlıq Müsabiqəsinin Fəxri diplomuna layiq görülmüşdür.
2015-ci ildə İkinci Bakı Beynəlxalq Memarlıq Müsabiqəsinin fəxri diplomuna layiq görülmüşdür.
2015-ci ildə "Atrium Şıxov" yaşayış kompleksinin layihəsi Şərqi Avropa və MDB ölkələri arasında "İlin ən yaxşı layihəsi (tikintisi)" üçün XIII Beynəlxalq Baxış Müsabiqəsinin Birinci dərəcəli Diplomuna layiq görülmüşdür.
2016-cı ildə "Konstruktivizm dövrü. XX əsrin 1920–1930-cu illərinin Bakı memarlığı" kitabı Şərqi Avropa və MDB ölkələri arasında "İlin ən yaxşı çap nəşri" üçün XIV Beynəlxalq Baxış Müsabiqəsinin Birinci dərəcəli diplomuna layiq görülmüşdür.
2018-ci ildə Zirə kəndindəki Cümə məscidi Ağa Xan Fondunun Memarlıq Mükafatına namizəd oldu.

Ədəbiyyat

Lalə Azəri, "Memarlıq nümunəsi yerləşdiyi ərazinin tarixini göstərməlidir" (müsahibə), "Mədəniyyət" qəzeti. — 2012. — 24 oktyabr.- Səh. 12.

İstinadlar

↑ Sevda İsmayıllı. "Elçin Əliyev: "İndi Bakıda mansard dəbə minib"" (az.). azadliq.org. 13.04.2011. 2016-03-05 tarixində arxivləşdirilib. İstifadə tarixi: 2014-11-03.
↑ ¹ ² "REAL Gənclər Birliyi: "Bakı: dünən, bu gün və sabah"". 2023-02-16 tarixində arxivləşdirilib. İstifadə tarixi: 2023-02-16.
↑ "Elbay Qasımzadədən tənqidlərə münasibət: "Elçin Əliyev adlı memar tanımıram"". Report İnformasiya Agentliyi (az.). 2022-12-09. 2024-08-28 tarixində arxivləşdirilib. İstifadə tarixi: 2024-08-28.
↑ "Azərbaycan Memarlar İttifaqı İdarə Heyətinin Gəncədə səyyar plenumu keçirilib". 2019-02-20 tarixində arxivləşdirilib. İstifadə tarixi: 2024-08-28.
↑ "23 SAYLI NƏSİMİ-SƏBAİL SEÇKİ DAİRƏSİ ÜZRƏ QEYDƏ ALINANLARIN SİYAHISI". www.infocenter.gov.az. 2024-08-22 tarixində arxivləşdirilib. İstifadə tarixi: 2024-08-30.

[1] Sevda İsmayıllı. "Elçin Əliyev: "İndi Bakıda mansard dəbə minib"" (az.). azadliq.org. 13.04.2011. 2016-03-05 tarixində arxivləşdirilib. İstifadə tarixi: 2014-11-03.

[:0-2] ¹ ² "REAL Gənclər Birliyi: "Bakı: dünən, bu gün və sabah"". 2023-02-16 tarixində arxivləşdirilib. İstifadə tarixi: 2023-02-16.

[3] "Elbay Qasımzadədən tənqidlərə münasibət: "Elçin Əliyev adlı memar tanımıram"". Report İnformasiya Agentliyi (az.). 2022-12-09. 2024-08-28 tarixində arxivləşdirilib. İstifadə tarixi: 2024-08-28.

[4] "Azərbaycan Memarlar İttifaqı İdarə Heyətinin Gəncədə səyyar plenumu keçirilib". 2019-02-20 tarixində arxivləşdirilib. İstifadə tarixi: 2024-08-28.

[5] "23 SAYLI NƏSİMİ-SƏBAİL SEÇKİ DAİRƏSİ ÜZRƏ QEYDƏ ALINANLARIN SİYAHISI". www.infocenter.gov.az. 2024-08-22 tarixində arxivləşdirilib. İstifadə tarixi: 2024-08-30.

[1]

[2]

[3]

[4]

[5]