Kükürd qazından təmizlənmə üsulları

Kükürd qazından təmizlənmə üsulları — Sənaye müəssisələrində atmosfer havasına buraxılan tullantı qazları ayrı-ayrı zərərli kimyəvi birləşmələrdən təmizlənməsi üçün hər bir maddənin kimyəvi xassələri ilə şərtlənən spesifik üsuldur.

Kükürd qazı

Atmosferi kükürd qazı (SO₂)ilə ən çox çirkləndirən mənbələr əlvan metallurgiya, istilik-energetika və sulfat turşusu istehsal qurğularıdır.

Qrupları

Havaya buraxılan qazları kükürd-4-oksiddən təmizləməyin üsullarını 2 qrupa bölmək olar:

Sonradan sərbəst halda çıxarmadan təmizləmə;
Utilləşdirmək məqsədilə sonradan sərbəst halda çıxarılmaqla təmizləmə.

Kükürd qazından təmizlənən tullantı qazlar seçilən üsuldan asılı olaraq öncədən təmizləyici qurğunun işinə mane olan bərk hissəciklərdən, hidrogen-sulfiddən, nəmdən, oksigendən və başqa maddələrdən ayrılmalıdır.

Kükürd qazını zərərsizləşdirməyin üsulları

Atmosferdə kükürd qazı

Kükürd qazını zərərsizləşdirməyin mühüm üsulları aşağıdakılardır:

Maqnezit üsulu
Əhəng üsulu
Ammonyaklı tsiklik proses
Ammonyak turşu üsulu
Quru ammonyak üsulu
Manqan-oksid üsulu
İonitlərlə SO₂-nin təmizlənməsi

Maqnezit üsulu

Burada tərkibində SO₂ olan qazlar maqnezium-oksid suspenziyasından keçirilərək maqnezium-sulfitə çevrilir.

Əhəng üsulu

Bu üsulda qazlar əhəngli suspenziyadan keçirilir. Üsul ucuzdur və udulma tam gedir.

Ammonyaklı tsiklik proses

Burada qazlar ammonyak məhlulu ilə alçaq temperaturda absorbsiya edilir, sonra qızdırılaraq ondan sərbəst şəkildə ayrılır. Absorbsiya prosesində ammonium-sulfit və ammonium-hidrosulfit əmələ gəlir.

Ammonyak turşu üsulu

Bu üsulda kükürd qazı ammonium-sulfit məhlulu ilə udulur, sonra H₂SO₄ əlavə edilməklə ondan ayrılır.

Quru ammonyak üsulu

Burada tüstü qazlarında olan SO₂ qazı V₂O₅ katalizatoru üzərində oksidləşdirilərək SO₃-ə çevirilir, sonra əmələ gələn kükürd-6-oksid tüstü qazlarında olan su buxarı ilə birləşərək sulfat turşusu dumanına çevrilir. Qarışığa ammonyak qazı buraxıldıqda ammonium-sulfat kristalları əmələ gəlir.

Manqan-oksid üsulu

Adsorbent kimi vakuumda 300–400^oC qurudulmuş manqan-3-oksiddən (Mn₂O₃) istifadə edilir. Tərkibində SO₂ olan tüstü qazı uducu qüllədə manqan 3-oksidlə udulur, sonra oksidləşdirilərək SO₃-ə çevrilir və su dumanı (kapilyar nəmlik) ilə qarışdırılaraq H₂SO₄ əmələ gətirir. O da manqan 3-oksidlə qarşılıqlı təsirdə olub manqan 3-sulfata çevrilir.

İonitlərlə SO₂-nin təmizlənməsi

İonitlər molekulyar corbentlərdir. Adsorbsiya prosesində qaz molekulları ilə kimyəvi reaksiyalar baş verir, həm də ionitdəki suda həllolunma gedir. Proses zamanı tullantı qaz ionit təbəqəsindən keçirilir və eyni vaxtda oraya qələvi (NaOH) məhlulu verilir. NaOH qələvisi əvəzinə 25%-li ammonyak məhlulu da işlənir.

Mənbə

A.Əliyev "Kimya-Ekologiya", Bakı-1996.