Kacima Seybey

Kacima Seybey (鹿島 清兵衛, 1866, Tenma^[d] – 6 avqust 1924) – Yaponiya fotoqrafı. 1890-cı illərdə Yaponiyanın ən nüfuzlu həvəskar fotoqrafı olmuşdur. Sake biznesi ilə məşğul olan varlı ailənin başçısı olan Kacima öz maliyyə gücündən istifadə edərək bir çox fotoqrafı və fotoqrafiya təşkilatını dəstəkləmiş, "milyonçu fotoqraf" (şaşin daycin) ləqəbi ilə tanınmışdır.

Kacima Seybey
yap. 鹿島清兵衛
1890-cı ildə.
Doğum tarixi	1866
Doğum yeri	Tenma[d], Kita-ku[d], Osaka, Yaponiya
Vəfat tarixi	6 avqust 1924(1924-08-06)
Dəfn yeri	Tama qəbiristanlığı[d]
Həyat yoldaşı	Kaşima Etsu[d]
Uşağı	Kuni İizuka[d]
Fəaliyyəti	fotoqraf
Üzvlüyü	Yaponiya Fotoqrafiya Cəmiyyəti
Vikianbarda əlaqəli mediafayllar

İlk illəri

Kacima Seybey 1866-cı ildə Osaka şəhərinin Tenma rayonunda doğulmuşdur. Doğum adı Masanosuke olmuşdur. O, sake satışı ilə məşğul olan varlı Kacimaya ailəsinin Osaka qolunun başçısı Seyemon Kacimanın ikinci oğlu idi. 1885-ci ildə Kacimaya ailəsinin Tokio qolunun ən böyük qızı Nobu ilə evlənərək həmin ailəyə daxil olmuş və VIII Kacima Seybey adını qəbul etmişdir. Tokioya köçərək ailənin biznes varisi olmuşdur.

Kacima uşaqlıqdan etibarən sağlamlıq problemlərindən əziyyət çəkdiyi üçün musiqi, laklama və tüfəng atıcılığı kimi daha sakit sahələrə maraq göstərmişdir. Atası bir az fotoqrafiya ilə məşğul olmağa çalışsa da, uğur qazanmamışdır. Onun fotoqrafiyaya marağı oğluna keçmişdir.

Fotoqrafiya

Uğurlu fəaliyyəti

Kacima ailə biznesini ələ aldıqdan sonra köhnə kamera almış və təcrübələr aparmağa başlamışdır. Fotoqrafiyanı daha yaxşı öyrənmək üçün 1885-ci ildə Tokionun Asakusa bölgəsində məskunlaşmış fotoqraf İmatsu Seycirodan kömək istəmiş və britaniyalı mütəxəssis Vilyam Börtonla dostlaşaraq fotoqrafiya texnikası haqqında biliklər əldə etmişdir. Tezliklə vaxtının çoxunu kamera arxasında keçirməyə başlamışdır. Kacimaya ailəsinin maliyyə vəsaitindən istifadə edərək ən yaxşı kimyəvi maddələri və ləvazimatları almışdır. Dostlarının fotolayihələrini, eləcə də, öz fotoqrafiya turlarını maliyyələşdirmişdir. 1889-cu ildə Oqava Kazumasanın "Ogawa Shashin Seihanjo" kollotipiya şirkətini maliyyələşdirmişdir. Həmin il Yaponiya Fotoqrafiya Cəmiyyətinin qurucu üzvlərindən biri və əsas maliyyə dəstəkçisi olmuşdur. 1893-cü ildə cəmiyyətin təşkil etdiyi Əcnəbi Fotoqrafiya Sərgisinin uğurundan 1 ay sonra Böyük Yaponiya Fotoqrafiya Tənqidi Cəmiyyətini yaratmışdır.

Pontanın fotoportreti.

Kacimanın xüsusi maraq sahəsi nəhəng ölçülü fotolar istehsal etməyə yarayan kameralar idi. 1893-cü ilin noyabrında ABŞ-dən böyük ölçülü kamera gətizdirmişdir. 1894-cü ildə Nikko və Koşu rayonlarına təşkil etdiyi fotoqrafiya turu zamanı zenşi ölçülü fotoları bu kamera ilə çəkmişdir. Təchizatı daşımaq üçün 20-dən çox fəhlənin köməyindən istifadə etmişdir. Həmin il eyni kamera ilə Fuci dağının 2.7 x 1.5 metr ölçüsündə fotosunu çəkmiş və fotonu İmperator Meycinin toyunun 25 illiyi münasibətilə ona təqdim etmişdir. 1895-ci ildə kabuki aktyoru IX İçikava Dancuronun real ölçülü fotosunu çəkmək üçün xüsusi kamera hazırlamaq sifarişi almışdır. 1894-cü ildə Yaponiya Fotoqrafiya Cəmiyyəti tərəfindən ona "Həvəskar fotoqrafların kralı" titulu verilmişdir. O, "Shashin Sowa" fotoqrafiya jurnalının sahibi idi. 1895-ci ilin fevralında Tokionun Ginza rayonunda öz fotostudiyasını açmış, qardaşı Seyzaburonu fotoqrafiya təhsili almaq üçün İngiltərəyə göndərmişdir. Kacimanın fotostudiyası "Genrokukan" adlanırdı və Qərb üslubunda olan ikimərtəbəli bina idi. 18 metr hündürlüyündə olan bina ən son işıqlandırma texnologiyası və liftlə təchiz olunmuşdu. Burada kollotipiya çapı, mis qravüraçılığı və fotolitoqrafiya üçün nəzərdə tutulmuş fotomexanika şöbəsi var idi. "Psevdoelm" şöbəsi isə mikro və telefotoların hazırlanması üçün nəzərdə tutulmuşdu. Bir neçə ay sonra fotostudiyada sənət qalereyası yaradılmışdı. Kacima həmin il Toda Ucitaka ilə birlikdə Yaponiya Sehrli Fənər Cəmiyyətini təsis etmişdir. 1896-cı ildə uğurla hazırladığı rentgen fotoqrafiyasını nümayiş etdirmişdir.

Müflisləşməsi

Kacima fotoqrafiya fəaliyyətləri ilə çox məşğul olduğu üçün sake biznesinə çox vaxt ayıra bilmirdi. Bu səbəbdən o və Kacimaya ailəsi arasında gərginlik yaranmışdır. 1896-cı ilin martında Kacima ailə biznesinə nəzarət etməkdən və mirasdan mərhum edilmiş, arvadı ilə ayrılmağa məcbur olmuşdur. Ona 250.000 yen və aylıq müavinət verilmişdir. Kacima pulun bir hissəsini Ponta (Tanida Etsu) kimi tanınan məşhur Şimbaşi geyşasını geri almaq üçün istifadə etmişdir. 1890-cı ildə fotosunu çəkərkən tanış olduğu Ponta ilə birlikdə Kiotoya köçərək "Tokyo Genrokukan" kimi tanınan fotostudiya açmışdır. Həm yeni fotostudiyası, həm də Osakada çap şirkəti açmaq cəhdi uğursuz olmuşdur. Tokionun Honqo Haruki məhəlləsindəki bir studiyanı idarə etməyə çalışsa da, növbəti dəfə uğursuzluğa uğramışdır. 1897-ci ilin fevralında İmperatriça Eyşonun dəfn mərasimini gecə vaxtı maqnezium flaşı ilə uğurla çəkə bilmiş, Yaponiyada açıq havada gecə fotoqrafiyası ilə məşğul olan ilk şəxs olmuşdur. Lakin bir müddət sonra maqnezium tozu ilə işləyərkən baş verən partlayış nəticəsində sol əlinin baş barmağını itirmişdir. Müflis olduqdan sonra sponsoru olduğu fotoqrafiya cəmiyyətləri fəaliyyətini dayandırmışdır.

Kacima no üzrə ixtisaslaşmış Umekava məktəbində musiqiçi kimi işləməyə başlamış və özünə Kisaraqi Miki adını götürmüşdür. Yeni məşğuliyyəti ona müəyyən uğur gətirsə də, həyatının qalan hissəsini yoxsulluq və ehtiyac içində keçirmişdir. O, 1924-cü ildə, geyşa yoldaşı Ponta isə onun ölümündən 8 ay sonra ölmüşdür.

Qalereya

Kacima Seybeyin işləri

• 
  Ponta və Oen
• 
  Miyacimanın görünüşü
• 
  Fuci dağı və Taqonoura köprüsünün görünüşü
• 
  Durnanın belində fleyta çalan qadın

Ədəbiyyat

• Bennett, Terry. Photography in Japan: 1853–1912 (ingiliscə). Tuttle Publishing. 2006. 238–241. ISBN 0-8048-3633-7. İstifadə tarixi: 15 dekabr 2024.
• Tucker, Anne; Iizawa, Kōtarō; Friis-Hansen, Dana; Ryuichi, Kaneko; Kinoshita, Naoyuki; Joe, Takeba. The History of Japanese Photography (ingiliscə). Yale University Press. 1 yanvar 2003. səh. 346. ISBN 9780300099256. İstifadə tarixi: 15 dekabr 2024.