Nevton Qriqoryan

Nevton Avanesoviç Qriqoryan (6 dekabr 1920, Bakı – fevral 1979) — Azərbaycan-sovet kamançaçalanı, Azərbaycan SSR xalq artisti (1978).

Nevton Qriqoryan
Ümumi məlumatlar
Doğum tarixi	6 dekabr 1920
Doğum yeri	Bakı, Bakı qəzası, Azərbaycan SSR
Vəfat tarixi	fevral 1979 (58 yaşında)
Vətəndaşlığı	SSRİ
Musiqiçi məlumatları
Fəaliyyəti	musiqiçi
Fəaliyyət illəri	1934–1979
Janrlar	klassik musiqi, muğam, xalq musiqisi
Musiqi aləti	kamança
Mükafatları

Həyatı

Nevton Qriqoryan 1920-ci ildə Bakı şəhərində anadan olmuşdur. 1934-cü ildən Bakıda A. İoannesyanın rəhbərlik etdiyi xalq çalğı alətləri orkestrində işləmişdir. Peşəkar musiqiçi kimi öz yaradıcılıq fəaliyyətinə 1936-cı ildə M. Maqomayev adına Azərbaycan Dövlət Filarmoniyasında başlamış və 40 ildən artıq burada işləmişdir.

Azərbaycan klassik musiqisi, muğamlar, rənglər, təsniflər Nevton Qriqoryanın yaradıcılığında mühüm yer tutmuşdur. Müslüm Maqomayevin, Asəf Zeynallının və başqa Azərbaycan bəstəkarlarının əsərlərini səsləndirən N. Qriqoryan Moskvada birinci Azərbaycan incəsənəti ongünlüyünün, xalq musiqi alətləri ifaçılarının ümumittifaq müsabiqəsinin iştirakçısı olmuşdur. O, Böyük Vətən müharibəsinin iştirakçısı olmuş, bir sıra medallarla təltif edilmişdir.

Nevton Qriqoryan Xan Şuşinski, Zülfü Adıgözəlov və başqa xanəndələri müşayiət etmiş, SSRİ-nin bir sıra şəhərlərində, eləcə də İran, İraq, Suriya və Livanda çıxış etmişdir.

Mükafatları

• "Azərbaycan SSR əməkdar artisti" fəxri adı — 25 sentyabr 1954
• "Azərbaycan SSR xalq artisti" fəxri adı — 11 yanvar 1978
• "İgidliyə görə" medalı — 6 noyabr 1947

Ədəbiyyat

• Азәрбајҹан Совет Енсиклопедијасы: [10 ҹилддә]. III ҹилд: Гајыбов—Елдаров. Бакы: Азәрбајҹан Совет Енсиклопедијасынын Баш Редаксијасы. Баш редактор: Ҹ. Б. Гулијев. 1979. 627 с.
• "Н. А. Григорјан". № 50 (17090). Коммунист. 1 март 1979-ҹу ил.