Rauf Qasımov
Rauf Qasımov (azərb. Qasımov Rauf Cabbar oğlu; d. 5 mart, 1943-cü il, Azərbaycan Respublikasının Tovuz rayonunun Qoşakəndi) - Tibb elmləri doktoru, professor. Professor A.L.Polenov adına Rusiya Elmi‑Tədqiqat Neyrocərrahiyyə İnstitutunun şöbə müdiri.[1]
| Rauf Qasımov | |
|---|---|
| Rauf Cabbar oğlu Qasımov | |
| Doğum tarixi | |
| Doğum yeri | Tovuz rayonu, Qoşakənd |
| Elm sahəsi | Tibb |
| Elmi dərəcəsi | Tibb elmləri doktoru |
| İş yeri | A.L.Polenov adına Rusiya Elmi‑Tədqiqat Neyrocərrahiyyə İnstitutu. |
| Mükafatları |
  |
Həyatı redaktə
Qasımov Rauf Cabbar oğlu 1943-cü il martın 5-də Azərbaycan Respublikasının Tovuz rayonunun Qoşa kəndində anadan olub. 1968-ci ildə N.Nərimanov adına Azərbaycan Tibb İnstitutunu (indiki Azərbaycan Dövlət Tibb Universiteti) fərqlənmə diplomu ilə bitirib. Elə həmin il Azərbaycan Səhiyyə Nazirliyinin təyinatı ilə professor A.L.Polenov adına Leninqrad Neyrocərrahiyyə İnstitutunun (ölkənin qocaman elmi müəssisəsi və dünyada ilk elmi-praktiki neyrocərrahiyyə institutu 1926-cı ildə yaradılıb; hazırda professor A.L.Polenov adına Rusiya Elmi-Tədqiqat Neyrocərrahiyyə İnstitutu adlanır, 2015-ci ildən Şimal-Qərb Federal Tibbi Tədqiqat Mərkəzinin filialıdır) ordinatura və aspiranturasına göndərilib. 1973-cü ildə R.Qasımov ağır kəllə-beyin zədəsi ilə beyin oksidləşdirmə-reduksiya proseslərinin pozuntusuna həsr edilmiş namizədlik dissertasiyası müdafiə edib. Əldə edilmiş məlumatlar əsasında, o, bu pozuntuların medikamentoz korreksiyası metodlarını işləyib hazırlayıb. Dağılmış beyin ocaqlarının mövcudluğu ilə ağır kəllə-beyin zədələrinin diaqnostikası və müalicəsinə həsr olunan doktorluq dissertasiyasını R.Qasımov 1989-cu ildə müdafiə edib. Professor R.Qasımov tərəfindən tibbi praktikada ilk dəfə beyin yarımkürələrinin böyük dağılma ocaqlarının mövcudluğu ilə ağır kəllə-beyin zədələrinin kliniki gedişi tipi nəzərə alınmaqla ilkin diaqnoz və fərqli cərrahi taktika sistemi hazırlanıb. Klinik və cərrahi mövqedən beynin dağılma ocaqlarının xarakterik formaları və kliniki gedişi tədqiq və təsvir edilib. Onun klinik-fizioloji, klinik-bioloji və neyrohistoloji araşdırmaları əsasında beyin yarımkürələrinin dağılma ocaqlarının kompleks müalicəsi metodu hazırlanıb. R.Qasımovun tətbiq etdiyi yeni reanimasiya metodları – dərman vasitələrinin regional daxili arterial infuziyaları – qan dövranının təkrar yaranan pozuntularının qarşısını almaqla beyin toxumasının nekrozunun artmasını dayandıra bilər. R.Qasımovun təşəbbüsü ilə onun rəhbərlik etdiyi şöbədə reanimasiya və intensiv terapiya palataları təşkil olunub, kəllə qübbəsi və onurğa sümüklərində bərpa əməliyyatları kompleksi, eləcə də bir sıra reabilitasiya tədbirləri hazırlanıb və tətbiq olunub. 1999-cu ildə R.Qasımov “Rusiya Federasiyasının Əməkdar Həkimi”, 2007-ci ildə “Rusiya Federasiyasının Əməkdar Elm İşçisi” fəxri adları ilə təltif olunub. İnstitut isə 2015-ci ildə, o cümlədən R.Qasımovun əməyi sayəsində, “nevrologiya”, “neyrocərrahiyyə” nominasiyalarında Sankt-Peterburqun ən yaxşı klinikaları reytinqinin laureatı diplomu alıb. Professor R.Qasımov 300-dən çox elmi məqalənin, neyrocərrahiyyənin müxtəlif aspektlərinə həsr olunan 4 monoqrafiyanın müəllifidir. Onun patentlə müdafiə olunan neyrocərrahiyyə praktikası sahəsinə aid 19 ixtirası var. O, elmlər doktoru dərəcəsi verilməsi üzrə Rusiya Elmi-Tədqiqat Neyrocərrahiyyə İnstitutunun Elmi Şurasının üzvüdür. Onun rəhbərliyi altında onlarla magistr və doktorluq dissertasiyası hazırlanıb və müdafiə edilib. R.Qasımov - əməliyyat aparan cərrahdır. Bir çox xəstə onun “qızıl əllər”i və unikal həkim həssaslığı haqqında tərifli rəylər və minnətdarlıq sözləri yazıb. Elmi-Tədqiqat İnstitutunun pasiyentlərindən biri qeyd edib: “Rauf Qasımov Azərbaycanın qürurudur”. Onun yolunu professor A.L.Polenov adına Rusiya Elmi-Tədqiqat Neyrocərrahiyyə İnstitutunda işləyən oğlu Vüqar Qasımov davam etdirir. R.Qasımov “Sankt-Peterburqun 300 illiyi xatirəsinə” medalı ilə təltif edilib.[1]
İstinadlar redaktə
- ↑ 1 2 Bağıyeva, Mətanət. Xaricdə yaşayan azərbaycanlılar. Qısa bioqrafik məlumat kitabçası (PDF) (az.). Bakı: "Papirus NP". 2016. ISBN 978-9952-8299-1-4. 2017-10-21 tarixində arxivləşdirilib (PDF). İstifadə tarixi: 2017-10-21.