Shashin Shimpo

"Shashin Shimpo" (写真新報, hərf. Fotoqrafiya xəbərləri) – 1882–1940-cı illərdə (fasilələrlə) Yaponiyada nəşr olunmuş aylıq fotoqrafiya jurnalı. 1890-cı illərdə Şərqi Asiyanın ilk, Yaponiyanın isə yeganə fotoqrafiya jurnalı idi.

Shashin Shimpo
写真新報
Növ	fotoqrafiya
Dövrilik	aylıq
Təsisçi	Fukasava Yokitsu (1882 və 1896) Oqava Kazumasa (1889)
Təsis tarixi	sentyabr 1882
Nəşrini dayandırıb	dekabr 1940
Ölkə	Yaponiya
Qərargah	Tokio
Dil	yapon dili

Tarixi

"Shashin Shimpo" 1882-ci ildə Fukasava Yokitsu tərəfindən təsis olunmuşdur. Jurnalın təsisçi nəşriyyatı Tokioda yerləşən "Choyosha" nəşriyyatı idi. "Shashin Shimpo" 1874-cü ildə Yaponiyanın ilk fotoqrafiya jurnalı kimi yaradılmış, cəmi 3 sayı nəşr olunmuş "Datsuei yawa" (hərf. Fotoqrafiya hekayələri) jurnalının, eləcə də, həmin jurnalın xələfi olan, 1880–1881-ci ildə 7 sayı nəşr olunmuş "Shashin Zasshi" (hərf. Fotoqrafiya jurnalı) jurnalının davamçısı kimi yaradılmışdır. Fukasava Yokitsu hər iki jurnalın redaktəsində iştirak etmişdi.

Jurnalın ilk sayı 1882-ci ilin sentyabrında nəşr olunmuşdur. ABŞ-də yaşayan fotoqraf Oqava Kazumasa ABŞ fotoqrafiyası haqqında hesabatlarını bu jurnala göndərirdi. 18 sayı nəşr olunduqdan sonra jurnal 1884-cü ilin sentyabrında fəaliyyətini dayandırmışdır. Oqava Yaponiyaya qayıtdıqdan sonra 1889-cu ildə jurnalı yenidən təsis etmiş və redaktoru olmuşdur. Bu dəfə "Hakubundo Shoten" nəşriyyatı tərəfindən nəşr olunan jurnalın ilk sayı 1889-cu ilin fevralında işıq üzü görmüşdür. Fotoqrafiya avadanlıqlarının tədarükü ilə məşğul olan "Asanuma Shōkai" şirkəti jurnalın distrubüteri idi. Oqava 1894-cü ilə qədər jurnalı redakə etməyə davam etmişdir. Jurnal 1896-cı ilin sentyabrında fəaliyyətini dayandırsa da, 2 ay sonra – dekabrda Fukasava Yokitsu və "Shashin Shimposha" nəşriyyatı tərəfindən fəaliyyəti bərpa olunmuşdur. 1916-cı ilin iyulunda Tokio Təsviri İncəsənət Məktəbinin professoru Mori Yoşitaro jurnalın baş redaktoru olmuşdur. Jurnal 1940-cı ilin dekabrına qədər nəşr olunmuşdur. Yaponiya ordusunun jurnal və qəzetləri konsolidasiya etmə siyasəti nəticəsində bağlanmışdır.

Xüsusiyyətlər

"Shashin Shimpo" Yaponiyada həvəskar fotoqraflar üçün əsas informasiya mənbəyi idi. Jurnalda universitet professorlarının yazıları və xarici nəşrlərin tərcümələri çap olunurdu. 1889-cu ilin aprelində Asay Çunun "Fotoqrafiyada kompozisiya" (Şaşin no içi) essesi, 1893-cü ilin mayında Şimooka Renconun avtobioqrafiyası "Fotoqrafiya hekayəsi" (Şaşin cireki) jurnalda serializasiya olunmağa başlamışdır. Oxucuları arasında Yaponiya Fotoqrafiya Cəmiyyətinin üzvləri var idi. Üzvlərin çəkdikləri fotolar "Shashin Shimpo" jurnalında nəşr olunurdu.

Ədəbiyyat

• Tucker, Anne; Iizawa, Kōtarō; Friis-Hansen, Dana; Ryuichi, Kaneko; Kinoshita, Naoyuki; Joe, Takeba. The History of Japanese Photography (ingiliscə). Yale University Press. 1 yanvar 2003. səh. 378. ISBN 9780300099256. İstifadə tarixi: 13 dekabr 2024.

Xarici keçidlər

• "A photographic publication for Japan" ("British Journal of Photography", 1889).