Siyavuş Şirinzadə
Siyavuş Əlisəftər oğlu Şirinzadə (mart 1937, Bakı — 16 may 2010, Moskva)[1], — Azərbaycanlı alim[1], texnika elmləri doktoru, professor[2].
| Siyavuş Şirinzadə | |
|---|---|
| Siyavuş Əlisəftər oğlu Şirinzadə | |
| Doğum tarixi | mart 1937-ci il |
| Doğum yeri | Bakı, Azərbaycan |
| Vəfat tarixi | 16 may 2010-cu il |
| Vəfat yeri | Moskva |
| Milliyyəti | azərbaycanlı |
| Uşağı | 1 |
| Elm sahəsi | Neft |
| Elmi dərəcəsi | texniki elmlər doktoru |
| Elmi adı | professor |
| Təhsili | Azərbaycan Dövlət Neft və Sənaye Universiteti neft-qaz quyularının qazılması üzrə neft mühəndisi ixtisası |
| Mükafatları | İki dəfə Qubkin mükafatı laureatı, Vyetnamın "Xalqlar dostluğu" ordeni |
Həyatı
redaktəSiyavuş Əlsəftər oğlu Şirinzadə 1937-ci ilin mart ayında Bakıda müəllim ailəsində anadan olmuşdur. 1954–1959-cu illərdə Azərbaycan Dövlət Sənaye İnstitutunda (İndiki ADNSU) neft-qaz quyularının qazılması üzrə neft mühəndisi ixtisası üzrə təhsil almışdı.[2]
16 may 2010-cu ildə Moskvada qəflətən vəfat etdi. Ata-anasının uyuduğu Xırdalan qəbiristanlığında dəfn olundu[1].
Fəaliyyəti
redaktəSiyavuş Şirinzadə 1959-cu ildə Duvannı Qazma İdarəsində qazmaçı köməkçisi, sonra isə mühəndis kimi işə başlamışdır.[1]
1962-1966-cı illərdə Siyavuş Şirinzadə “Azneftemaş” Elmi Tədqiqat İnstitutunda quyuların qazılması üzrə mühəndis, böyük mühəndis vəzifələrində fəaliyyət göstərdi. Həmin illərdə Siyavuş Şirinzadə qazma göstəricilərinin yaxşılaşdırılmasında yeni üsullarla bağlı apardığı elmi-tədqiqat işini başa çatdıraraq 1966-cı ildə görkəmli alim M.Seyidrzanın rəhbərliyi altında namizədlik dissertasiyasını müdafiə etdi.[1]
1966-cı ildə yenicə yaranmış SSRİ Neft Sənayesi Nazirliyini perspektivli və təcrübəli kadrlar hesabına möhkəmləndirmək məqsədilə təcrübə mərkəzi olan Azərbaycandan istedadlı mütəxəssislər seçmə üsulu ilə işə dəvət ediləndə, 29 yaşlı Siyavuş Şirinzadə müsabiqədə qələbə qazanaraq, orada işə başlamışdı. Siyavuş Şirinzadəbu bu mühüm İttifaq nazirliyində 20 il texniki idarədə böyük mühəndis, baş texnoloq, baş idarənin şöbə rəisi kimi səmərəli fəaliyyət göstərmişdi.[2]
Böyük və məsul vəzifədə çalışmasına baxmayaraq, Siyavuş Şirinzadə, elmi-tədqiqat işlərindən ayrılmamış, elmi tədqiqatlarını davam edirdi. 1970-ci ildə Sovet İttifaqında ilk dəfə olaraq Moskvada Ümumittifaq Neft ETİ-də akademik Azad Mirzəcanzadə üçün böyük laboratoriya açıldı. Bu laboratoriyanın açılması Azərbaycan elminin inkişafında mühüm hadisə olmuş, neft istehsalının tərəqqisində böyük rol oynamış, həmçinin elmi-tədqiqat işlərinin genişlənməsinə təkan vermişdi. Yasir Rəsizadə, Yusif Məmmədov, Oleq Kaçalov, Otto Çubanov və başqaları bu böyük tədqiqat laboratoriyasına dəvət olunmuş, burada böyük elmi təcrübə keçmiş və sonra da məsul vəzifələrdə çalışmışlar. Siyavuş Şirinzadə də burada doktorluq dissertasiyası mövzusunda tədqiqatlara başlamışdır. Mühüm dövlət vəzifəsində işlərin çox olmasına baxmayaraq, Siyavuş Şirinzadə dünya şöhrətli akademik Azad Mirzəcanzadənin rəhbərliyi ilə tədqiqatlarını davam etdirmiş və 1982-ci ildə qazmada mürəkkəbləşmələr, onların proqnozlaşdırılması, onlarla mübarizə məsələlərinə həsr olunmuş dissertasiyasını uğurla müdafiə etmişdir. S.Şirinzadə dəfələrlə Avropa, Asiya, Afrika, Latın Amerikası ölkələrində keçirilən beynəlxalq konfranslarda məruzələrlə çıxış etmişdir.[2]
Siyavuş Şirinzadə 1986-1993-cü illərdə “Qazma texnikası” Elm İstehsalat Birliyində baş direktorun elmi işlər üzrə müavini, eyni zamanda o vaxtlar SSRİ-də qazma sahəsində ən aparıcı institut sayılan Ümumittifaq Qazma Texnikası ETİ-nin direktor müavini işləmişdir[1].
Siyavuş Şirinzadə alim-mütəxəssis kimi xaricilərin diqətini cəlb etmişdi və 1993-cü ildə mütəxəssislər yetişdirmək üçün Vyetnama dəvət olunmuşdu. O, "Vyetrospetrol" müştərək müssisəsinin baş elmi əməkdaşı kimi Vyetnamın perspektvli "Ağ Pələng" və "Əjdaha" yataqlarının işlənməsində bu ölkəyə yaxından kömək etmişdir. İşlədiyi 12 il ərzində Siyavuş Şirinzadə 3 elmlər doktoru, 7 elmlər namizədi yetişdirmişdir.[2]
Təltifləri
redaktəİki dəfə Qubkin mükafatı laureatı olmuşdu[3].
Vyetnamın neft yataqlarının işlənməsində səmərəli fəaliyyətinə, neft kadrlarının hazırlanmasında əməyinə görə[2] Vyetnam prezidenti tərəfindən[3] Vyetnamn ali mükafatı olan "Xalqlar Dostluğu" ordeni ilə təltif olunmuşdur[2].
Neft elminin və sənayesinin inkişafındakı xidmətlərinə görə Rusiya Federasiyasının prezidenti V.Putinin fərmanı ilə “Əməkdar neft sənayesi işçisi” fəxri adına layiq görülmüşdür[1].
Ailəsi
redaktəTexnika elmləri doktoru, professor Alçın Şirinzadənin qardaşıdır. Siyavuş Şirinzadənin oğlu Araz — Qubkin adına institutu bitirib elmi tədqiqatla məşğul olur.[1]
Əsərləri
redaktəSiyavuş Şirinzadə yüzdən çox elmi məqalənin, 12 kitabın müəllifi olmuşdu[1].
İstinadlar
redaktə- ↑ 1 2 3 4 5 6 7 8 9 Ismayilli. "Ulu Basqalın elm korifeyləri və məşhur ictlmai xadimləri -" (az.). 2014-03-27. 2024-08-30 tarixində arxivləşdirilib. İstifadə tarixi: 2024-08-30.
- ↑ 1 2 3 4 5 6 7 İsmayılov Qafar Qulamhüseyn oğlu, Səmədov Tofiq Əlövsət oğlu, İskəndərov Elman Xeyrulla oğlu, İsmayılova Fidan Babəli qızı. NEFT FAKÜLTƏSİNİN 100 İLLİK YADDAŞI (PDF) (az.). Bakı: ADNSU. 2020. 288–290. 2023-12-11 tarixində arxivləşdirilib (PDF). İstifadə tarixi: 2024-01-22.
- ↑ 1 2 "AZƏRBAYCAN MÜƏLLİMİ". www.muallim.edu.az. 2018-05-31 tarixində arxivləşdirilib. İstifadə tarixi: 2024-01-22.