Günəş (qəzet)

"Günəş" qəzeti — 1910-1911-ci illərdə Bakıda Azərbaycan dilində nəşr olunan ictimai-siyasi ədəbi qəzet.

Günəş
Növ	ictimai-siyasi ədəbi qəzet
Sahibi	Orucov qardaşları
Təsisçi	Oruc Orucov
Baş redaktor	Əhməd Kamal
Yazıçılar	Abdulla Şaiq Qafur Rəşad Mirzəzadə Abdulla bəy Divanbəyoğlu
Yaranma tarixi	20 yanvar 1910
Dil	Azərbaycan dili
Nəşrini dayandırıb	1911
Ünvan	Bakı

Tarixi

İlk nömrəsi 1910-cu il yanvarın 20-də çıxmışdır. 1910-cu (104 nömrə) və 1911-ci (17 nömrə) illərdə işıq üzü görmüşdür. Cəmi 121 nömrəsi çıxmışdır. Naşiri Orucov qardaşları, baş redaktoru Əhməd Kamal idi. Qəzetdə A.Şaiq, Q.Rəşad, A. Divanbəyoğlu və b. mütərəqqi fikirli ziyalılar iştirak etmişlər.

Mövzusu

"Günəş"də türk və islam birliyi ideyaları ardıcıl təbliğ olunurdu. Qəzet "Molla Nəsrəddin" jurnalını "millətimiz üçün faydalı, qiymətli bir ayineyi-ibrət" adlandırır, eyni zamanda onu ehtiyatlı olmağa çağırırdı ki, "qərəzi-şəxsi sahibləri onu özlərinə aləti-intiqam edib öz heysiyyətindən düşürməsinlər". "Günəş"də M.T.Ərəszadənin "Molla Nəsrəddin"lə polemika aparan məqalələri dərc olunmuşdu; amma bu məqalələr ümumən, mətbuat etikası tələblərindən kənara çıxmırdı. Dövrün digər mətbuat orqanları kimi, "Günəş" də öz səhifələrində "Molla Nəsrəddin"lə bağlı hadisələri - jurnalın yayılmasını, nəşrinin müvəqqəti dayandırılmasını, yenidən nəşrə başlamasını və s. işıqlandırırdı.

Həmçinin bax

• Molla Nəsrəddin (jurnal)

Mənbə

• Cəlil Məmmədquluzadə Ensiklopediyası. Bakı, 2008. səh.113-114.