Harry’s Bar

"Harry's Bar" ( "Harri bar" və ya "Harrinin barı") - "San-Marko" vaporetto dayanacağının yaxınlığında Kalle Valyaresso, 1323 ünvanında yerləşən restoran və bar. Yarandığı gündən bu yana Çipriani şirkətinə məxsusdur. (ing. Cipriani S.A.)

Müəssisənin loqotipi olan "Harrinin barı"nın pəncərəsi, Venesiya.

Yaranma tarixi

Harrinin barı 1931-ci ildə barmen Cüzeppe Çipriani tərəfindən açılmışdır. Çiprianinin öz dediyinə görə - gənc və varlıbostonlu Harri Pikerinq, Venesiyada özünün yaşadığı və Cüzeppe Çiprianinin barmen olaraq işlədiyi "Avropa" otelinin barına tez-tez gəlirdi. Çipriani, həmin dövrdə bir gün öz restoranını açacağına ümid edirdi. Bir gün Harri bara gəlməyi dayandıranda Çipriani ondan bunun səbəbini soruşmuşdu. Buna cavab olaraq Pikerinq, ailəsinin onu alkoqolizmdən xilas etmək üçün göndərdikləri Avropa səfərində içdiyini öyrənərək ona pul göndərməyi dayandırdıqlarını və özünün bundan sonra müflis olduğunu izah etdi. Çipriani tamamilə tanımadığı biri olduğuna baxmayaraq Harriyə 10000 lirə (təxminən 5000 ABŞ dolları) borc verdi. Bu hadisədən iki il sonra Pikerinq, otelin barına qayıtdı, içki sifariş verdi və Çiprianiyə 50.000 lirəni geri qaytardı. “Təşəkkür edirəm, Cüzeppe! - O, dedi - budur, mənim borcum, və öz barını açmaq üçün əlavə 40.000 lirə. Ancaq bir şərtim var - ona "Harrinin barı" adını qoyacaqsınız".

Biznesin böyüməsi

Çipriani ailəsi, hal-hazırda Nyu-Yorkda bir neçə restorana, bir səyahət agentliyinə və keterinqin sahibidir. Bu restoranları Cüzeppenin oğlu Arriqonun idarə edir. Ailə, həmçinin doğma Venesiyada "Harrinin barı" ilə yanaşı "Harrinin şirniyyatları" restoranına da sahibdir. (it. Harry's Dolci). Çipriani əmtəə nişanı (Cipriani SA) altında müxtəlif İtalyan delikatesləri - pasta, souslar,zeytun yağı, kitablar və mətbəx əşyaları - istehsal olunur. Çipriani şirkətinin rəsmiləri “Harrinin barı" restoranının ticarət markalarının təməli olduğunu deyirlər .

Hazırda şirkəti idarə edən Arriqo Çipriani və oğlu Cüzeppe (şirkətin qurucusu olan Cüzeppenin nəvəsi) 2007-ci ildə ABŞ-da vergidən yayınmaqda günahkar olduqlarını etiraf etmişdilər .

Mətbəx

"Harrinin barı" klassik italyan mətbəxindən yeməklər təqdim edən restorandır. Burada qiymətlər çox yüksəkdir (2001-ci ildə minestrone şorbası üçün 20 avro). Restoranın sahibinin sözlərinə görə, burada yalnız bazar günləri hazırlanan ossobuko o qədər mükəmməldir ki, bütün ətraf regionlardan, hətta Milandan olan qurmelər buraya axışırlar.

"Bellini" şaftalı kokteyli və xüsusi sousla mövsümlənən çiy mal əti dilimləri olan karpaçço burada icad edilib .

"Harrinin barı" həmçinin kiçik ayaqsız stəkanda verilən Quru Martini ilə məşhurdur. Restoranın təqdim etdiyi bu "quru martini" həddindən artıq "qurudur", bunun səbəbi yəqin ki, kokteyldə olan 10 hissə cin və 1 hissəsi vermut nisbətidir. Cüzeppe Çipriani öz kitabında xatırlayir ki, Ernest Heminquey bundan daha "quru" martini sifariş etməyi sevərmiş. Heminquey, həmin kokteylə britaniyalı feldmarşal Bernard Montqomerinin şərəfinə "Montqomeri" adı vermişdi. Bunun səbəbi kimi, yazıçı, Montqomerinin heç vaxt düşməndən 15 dəfə çox qoşunu olmadığı halda döyüşə girməməsini göstərirdi. Bu kokteyli də adi "quru martini" kimi hazırlayırlar - lakin cinin vermuta nisbəti burada 15 olur. "Harrinin barında" hələ də, bu kokteyli sifariş etmək mümkündür .

Məşhur ziyarətçilər

"Harrinin barı" uzunmüddətli olaraq bir çox məşhurun sevimli yerinə çevrilmişdi. Bura Ernest Heminqveyin ən sevdiyi restoran idi (bar dəfələrlə onun "Çayın kənarında, ağacların kölgəsində" romanında xatırlanır). Digər məşhur müştərilər arasında İtalyan drijor Arturo Toskanini, ixtiraçı Qulyelmo Markoni, rejissorlar Alfred Hiçkok və Vudi Allen, aktyorlar Çarli Çaplin, Orson Vells, yazıçı Truman Kapote, Baron Filip de Rotşild, yunan şahzadəsi Aspesiya Manos, milyarder Aristotel Onassis, zadəgan Barbara Hatton, sənət kolleksioneri və mesenat Peqqi Quqqenhaym da var idi .

• 
  Xaricdən görünüş
• 
  İnteryer
• 
  Şirkətin qəhvə fincanında loqosu
• 
  Pəncərənin küçədən görünüşü
• 
  Şirkətin loqosu olan külqabı

Həmçinin bax

• Karpaçço
• Bellini (kokteyl)

Ədəbiyyat

• Arrigo Cipriani. Harry's Bar. The Life and Times of the Legendary Venice Landmark (1st). 1996.
• Arrigo Cipriani. The Harry's Bar Cookbook. Italy by AGG Printing: John Blake Publishing Ltd. 2006. ISBN 1-85782-508-X.

Linklər

• "The Guardian" qəzetində «Harry's Bar, Venice» adlı məqalə (ing.)
• Çipriani şirkətinin veb saytı
• Rəssam Bobo İvanoviçin veb saytında "Harrinin barına" həsr olunmuş əsərləri.
• Harry's Bar. Restoranın venesiyalı fanatlarının saytı.