Vikipediya:Cəsur ol!

Qısa keçid-yönləndirmə
  • VP:CƏSUR
Cəsur ol! Su soyuq deyil.

Xoş gəlmisən.

Vikipediya yalnız hamı cəsur olduğu halda uğurlu alına bilər. Vikipediya sözün əsl mənasında azad məkandır. Burada gəz-dolaş, heç nədən çəkinmədən səhv bildiklərini düzəlt, məzmunca az hesab etdiyin məqalələri zənginləşdir və s. Bunu etməyə sənin tam ixtiyarın var! Hamı səndən məhz bu cür cəsurluğu gözləyir. Sözlərimdən şübhələnə bilərsən, amma inan ki, Vikipediya bu cür zənginləşir. Bu azad məkanda cəmi bir məhdudiyyət var - ƏXLAQ QAYDALARINA ƏMƏL ET! Digər istifadəçilərlə bərabər hüquqlu olduğunu heç zaman unutma!

Vikipediyada işləməyə başladıqdan qısa müddət sonra başa düşəcəksən ki, kiminsə öz yazdıqlarını mühafizə etməsi və onlara "sahib çıxması" burada faydasızdır.

Vikipediyada məqalə başlayan və ya məqalə zənginləşdirən kəs öz məqaləsinin digər istifadəçi tərəfindən dəyişdirilməsini (zərər verməmək şərti ilə!), oraya məlumat əlavə edilməsini təbii qarşılamalıdır. Çünki bir nəfər "HƏR ŞEYİ" bilə bilməz! Yalnız birgə fəaliyyət sayəsində istənilən nəticə əldə edə bilərik. Buna görə də, sənin yazdıqlarına edilmiş düzəlişləri öz məqalənin əksikliyi kimi qəbul etmə, deməli, sən maraqlı məqaləyə başlamısan və başladığın məqalə digər istifadəçilərin də marağına səbəb olub.

Azərbaycanca Vikipediyada hal-hazırda istədiyin qədər səhv tapa bilərsən :-( . Xüsusilə mətnin kompüter yığımı zamanı edilmiş və ya istifadəçinin məlumatsızlığından irəli gələn orfoqrafik səhvlər. Bu cür səhvləri tapıb düzəltsən sənə heç kim gözün üstə qaşın var deməz, əksinə, hamı minnətdar olar. Hətta bu səhifənin özündə də hansısa səhv tapıb düzəldə bilərsən. Yox əgər sən məqalədə radikal dəyişiklik etmək istəyirsənsə, istinad etdiyin mənbə olmalıdır. Yaxşı olardı ki, bu cür dəyişiklikləri əvvəlcə məqalənin müzakirə səhifəsində müzakirə edəsən.

Ola bilər ki, qarşına məzmunsuz, elə-belə yaradılmış və ya heç bir ensiklopedik dəyəri olmayan məqalə çıxsın. Cəsur ol! Çalış belə məqaləyə məzmun, ensiklopedik dəyər ver. Yox əgər görsən ki, məqalədə "ələ gələn" bir şey yoxdur, onda onu silinəcək səhifələr siyahısına {{sil}} sözlərini yazmaqla əlavə et. Əgər qərarını haqlı hesab etsələr, idarəçilər həmin məqaləni siləcəklər.

İndi cəsarət qazandınsa bu yazının üstünə bas və dəyişiklikləri necə edə biləcəyini öyrən.

Onu da unutma ki, Vikipediya üçün təkcə sən çalışmırsan, burada sənin çoxlu həmfikirlərin var-- çətinə düşəndə onlardan kömək istəməkdən çəkinmə.

Hələlik bu qədər....ilk məqaləni yazmaq üçün bu məqaləni də oxu (yazıya tıqla) və sən artıq ilkin tanışlıq ilə silahlanmış olacaqsan. Bir müddətdən sonra görəcəksən ki, Vikipediyadakı məqalələrin sayəsində sənin dünya görüşün daha da genişlənib.

Yazdığın məqalələrdə maksimum obyektiv ol, subyektivlikdən qaçmağa çalış!